人類永遠都鍾意貪快貪方便，做乜都想即刻搞掂，唔好煩到我。香港人生活節奏快，更加係想乜嘢都快靚正，最緊要解決咗個問題，之後有乜手尾就之後再算。亦都係因為呢個原因，傳統嗰套唔太人道而且唔科學嘅教狗方法非常流行，隨之而衍生嘅 dog training gear 就多不勝數。

用呢類方法或者工具去教狗，可能好快可以令到你唔想要嘅行為消失，不過背後有更多嘅問題往往會被忽略。





有幸搵咗 Idstone 喺19世紀 (1872年) 寫嘅訓狗書籍裡面嘅其中一頁同大家分享，你會見到好多唔同形式嘅「教狗」功具，有唔同效能，但共同嘅原理就係要隻狗受到傷害或者痛楚，而避免再做某一啲行為。我亦都花咗好少時間向 Google 大神求助，搵到今日2015年仲通行緊嘅教狗工具，用咗類似嘅排位去做一張圖。

有無發現用呢種傳統工具，甚至方法去教狗嘅人類喺過去143年，除咗工具做得精細咗同埋先進咗之外，就完全無進步過？

用以上工具點樣傷害到狗狗，我就唔詳細講。大家都可以試下喺搜尋器輸入「Prong d」，佢就會自動彈咗 prong collar damage 出嚟畀你睇。

其實喺動物行為學同埋動物學習嘅原理，已經都有差唔多成百年嘅進步，同埋實驗證實係無問題，點解人類仲咁依戀差唔多150年前嘅嗰套知識？

純粹係因為覺得作為一個人，搞唔掂一隻狗好失威好無面？

如果有讀者咁不幸仲鍾情緊以上嘅工具的話，你都可以問下自己：究竟地球係咪方型的？

老老實實睇多少少資料，或者搵個 force-free 嘅訓犬師傾吓。