我份人不嬲都唔咀刁，但有間餐廳我真係認為係完全唔得。偏偏嗰間餐廳就愈開愈多，搞到成日都見到佢。

仲記得有一次同朋友去嗰度食飯，受到嘅待遇真係難以接受。其實本身件事好簡單，只係我叫咗個套餐但佢又唔記得畀個湯我。咁我明明想要嘅係一個完整套餐，雖然你係有畀甜品同飲品我，但本身個套餐係包埋湯架。我就出咗去同個經理理論，點知啱啱先同個經理講完，後面排緊隊嘅其他食客就開始喺度話我啦。不停話我阻住佢哋拎野食浪費哂啲時間，為咗少少野就喺度嘈，無咗碗湯係唔係就會死。佢哋眼中嘅我只係一個阻住哂嘅食客，卻唔會理會我嘅要求係唔係合理，我爭取緊嘅係唔係我本身就應得嘅。後來個經理為咗息事寧人，就答應我一陣會親手送碗湯比我。

之後我就返去個位度等，同返個朋友講頭先件事。點知，佢嘅態度竟然唔係支持我，反而係質疑我點解要出去，多一事不如少一事。我之後就用個好好奇嘅態度問佢：「乜你對呢度好滿意咩？」

佢答返我：「唔係架，無得揀咪食住先。」

嗰一刻，我以為係佢未食過好野，所以我喺下一次聚會嗰陣同佢去咗間好啲嘅餐廳。諗住佢食過有質素啲就會開始有要求，唔會再成日幫襯嗰間餐廳。

點知我之後再約佢出去食飯，佢都係提議去返嗰間劣質餐廳。

我：「乜你覺得上次間野好食唔過依間咩？」
佢：「點會？呢間咁難食，但都無計架。鬼叫呢間方便。」

我：「都係搭車搭多三個字左右，你繼續幫襯呢間，佢有生意做就永遠都唔會執，你只會永遠都係食呢間。」
佢：「我邊度得閒？我仲要OT 。」

我：「咁你唔辛苦咩？」
佢：「咁咪唯有得閒嗰陣食好啲獎勵吓自己。」

結果唯有就佢，我又再次去份嗰間餐廳食野。喺得三個餐揀嘅情況底下，我又揀番同上次一樣嘅套餐。咁當然啦，佢都十分之連戲，仍然係唔畀個湯我。今次我選擇主動一啲，直接問佢拎咗個湯先。屌，果然都係同一個答覆，叫我返去等。返去等唔係問題，但今次我成個餐都食哂個湯都未送到，我只好再次出去同佢講。我一企起身，我個朋友就即刻問我啦。

佢：「你又想點呀?」
我：「佢仲未畀個湯我呀，梗係要同佢講啦。」
佢：「呢間野都唔係第一次唔畀湯人啦，坐返低啦。」
我：「唔係喎，咁佢既然係慣犯，我就更加要爭取啦。如果佢遲啲變本加厲，到時連個飯都無，我就飲水飲飽佢？ 大佬，我雖然樣衰啫，都有個胃架。」
佢：「咁咪等到時先算，你坐返低先啦。你唔坐返低，我食埋就直接走唔等你啦。」

之後我就無再講落去。因為我知道佢係怕麻煩唔想改變，那怕明知只要改變少少佢嘅生活質素會就變好。亦正如嗰間餐廳其他嘅食客一樣，那怕知道我想要嘅只係應得嘅微不足道嘅野，都會認為我係阻住哂浪費時間。

我曾經以為經濟學理論係好完善，唔好嘅餐廳會因為生意額慢慢減少而結業。最後能生存嘅只有不停自強嘅好餐廳。但如果大部份人都係用「好嘅又一餐，唔好嘅又一餐」嘅心態，咁根本係唔可能淘汰到差嘅野。即使部份人已經係擴闊咗自己嘅眼光，知道其他地方係可以有更好嘅選擇，佢哋都會怕麻煩而選擇繼續忍受。只會喺每年嘅嗰兩日大時大節先出去支持下好餐廳，其他日子都一邊鬧難食一邊密密食。咁根本唔可能改變到現狀。

被低估的不是智慧，而是惰性。