Turandot 係意大利作曲家 Puccini（1858–1924) 嘅遺作，當年佢喺未作完首歌劇，就因為癌症去世，最後係由 Alfano 做最後補遺。首演時，名指揮家 Toscanini 喺表演到 Puccini 寫作嘅部份就停止，以示對作曲家嘅專重。

Turandot 個故事好簡單：一位中國皇帝為公主 Turandot 招親，不過公主話要有篩選，要所有求婚者都係王子（呢個要求合理，因為要門當戶對），同埋能答佢提出嘅三個謎語。如果答唔到，就要人頭落地。

因為公主極索，歷年求婚者眾多，而人頭落地者亦不計其數。某年某月，一位落難王子竟然一擊即中，解開三個謎底；不過公主食言拒嫁，落難王子為求得真愛，就話：「如果聽日天光前你知我個名，我就願意為女死為女亡，送上人頭；如果答唔到，你就係我嘅！」公主表面 say yes，不過後著恐怖！

Turandot 下令，話要全城起底組做嘢；如果無人能夠起到底，就所有人都要死。於是全城人泛起白色恐怖，啲人四圍去起底。而落難王子就唱歌自娛，大唱 Nussun Dorma（無人能睡），而啲人就喺背後和音 Il nome suo nessun saprà, noi dovrem，ahimè, morir, morir!（無人知佢名，呢鑊重唔死硬！）。

故事嘅結局，係王子信真愛，自首同公主講出自己真名係 Calaf，由公主發落。而公主深受感動，同 Calaf 成親。

不過，現實嘅白色恐怖係唔會一晚就走，亦唔會因為你自首就免你一死，然後當無數。

不過都係一句：有信心未必會贏，無信心一定會輸。所以，大家要記著 Nessun Dorma 就尾嘅一句：All'alba vincerò! Vincerò! Vincerò!（天光我哋就會得到最後勝利！）