過去50日佔領，多數都係報導學生嘅抗爭，政府嘅回應，小商戶嘅申訴，大老闆嘅指控。好似都好少會提及打工仔，尤其係嗰戰中高層嘅呀哥呀姐，嗰啲所謂公司老屎忽嘅睇法。

早幾日見到王維基問官員有冇睇100毛。令我諗起上星期公司呀姐send咗個愛國反佔中WhatsApp畀各位同事，唔了解年青人嘅又豈止官員呢？以下同大家分享下我公司老屎忽點睇50日佔領。

（利申：我純粹講我呀哥呀姐壞話，當然係唔可能代表所有呀哥呀姐sss，大家當睇一個故事啦。）

呀哥呀姐嘅背景：

我做嗰間公司，用陳鑑林嘅講法，係一間大嘅公司，我每個月出咗糧，最終都會間接或直接畀返晒公司。而公司department嘅數量，就好似輕鐵站咁，即係好多。因為有好多個department，於是中高層嘅呀哥呀姐數目亦好很多。

呢啲呀哥呀姐大約40至50歲，佢哋上位嘅時間，大約就係香港起飛嘅時間。佢哋大多喺呢間大嘅公司做咗N年，而且暗地裡自覺成就唔錯。經常有意冇意灌輸畀我呢粒塵知，憑藉佢個人嘅努力，不凡嘅智慧，上到呢個位，所以你呢粒塵唔好羨慕佢，只要死做爛做，你呢粒塵都會有出頭嘅一日架。

呀哥呀姐有樓、有車、有工人，部份有仔女。而有仔女嘅，個仔女都係接受緊「外國勢力」教育。於是乎，有仔女嗰啲由於仔女喺外國，會留喺公司瘋狂OT；冇嫁嘅呀姐（唔講點解淨係話呀姐啦…），會將條命都畀埋公司，令公司由一間大嘅公司，進化成7-eleven，日以繼夜，夜以繼日咁運作。

我呢粒塵：
由於我呢間大嘅公司啲人都好少走，於是乎，我呢粒畢咗業3年嘅塵，就係我公司呀哥呀姐眼中嘅年青人代表啦。喺我呀哥呀姐眼中，我係代表全港九18區嘅青年界別嘅。

我呀哥呀姐眼中嘅佔中：
9月27日開始，我放咗兩星期Annual leave。喺我呀姐眼中，呢兩個星期，無論如何都關佔中事。我一返工，呀姐當然係要「問候」我：「有冇去佔中呀，佔成點呀？」喺呀姐眼中，佔中係一個假日消閒活動，基本上係同佢喺工聯會報工餘活動冇分別嘅。放工會再問候多你一次：「今晚係唔係又去訓街呀？byebye。」

呀哥呀姐必定要左探右探你佔中嘅細節，佢唔佔，但又對你佔萬般好奇：「係唔係約埋拖友仔一班人去呀？去到有咩玩架？」，總之，你一定係去玩架。

呀哥呀姐極力表現佢哋冇同社會脫節，「我有睇高登架，我都明你地後生嘅」。「呀姐，你知唔知咩係向左走向右走？」，呀姐：「我有睇，幾米個插畫，幾得意架。」

呀哥呀姐有強烈嘅局外人感覺，彷彿佢哋屋企唔喺銀河系，彷彿佢哋唔係香港人。

呢50日，阿姐又好似間公司係自己咁，大老闆上身，突然之間好體諒同憐憫「大嘅公司」。不停強調公司前景唔樂觀，而家佔中咁亂，今年bonus真係好難guarantee。呀哥呀姐明明畀大嘅公司壓搾緊，但佢哋唔覺得有問題之餘，反而會因為有得壓搾返我哋呢粒塵而得到快感。

呀哥呀姐上左岸，定係做慣狗？

呀哥呀姐有車，有樓，有仔女，上咗岸使咩爭取？咁自由，民主，公義呢？原來有咗物質就其他都唔使要？呢啲就叫上岸？

呀哥呀姐做咗半世狗，亦漸漸為自己係一頭狗而感到快樂。喺佢哋眼中，你哋班唔想做狗嘅年青人不腳踏實地，心頭高。「做咩要作出無謂嘅掙扎，我食鹽多過你食米啦，你地做嗰啲嘢我哋以前做過啦，唔work架」。佢哋有種好奇怪嘅心態，佢哋試咗唔得，就唔畀我哋試，並且好肯定我哋都唔得，明明我同佢係兩個獨立嘅個體。

「高分低能」就係形容嗰啲喺學校拎到高分但其實低低地嘅人。其實喺呢間大嘅公司，都有好多「高級低能」，嗰啲升咗上神台嘅高級職員，得到咗權力之後，瞬間變弱智，我對佢哋呢種後天進化成弱智嘅狀態表示非常遺憾。

PS：當我好驚做得耐會變成呀哥呀姐咁「狗」嘅時候，另一粒公司嘅塵同我講：「唔使驚啦你，公司啲老屎忽唔會畀你升架，你一世都係一粒無得升嘅塵，唔怕瞬間變弱智，你放心啦。」聽到呢番說話，到底我係唔係應該開心呢？