政治、人權、動物權益息息相關，我喺大帽山隻流浪獒仔單嘢度睇得好清楚。

眼見好多所謂動保份子，都係藍絲帶支持者，佢哋對警察嘅支持，簡直係畀咗副身家佢都無問題，令人動容。可惜，支持動保嘅大家，有無見到早兩日喺龍和道嘅警犬？佢哋普遍出現驚恐同無助嘅神情，假如佢哋因為失控咬人，無論係咬警察或者示威者，佢哋面對嘅結果只有一個：人道毀滅。試問動保人士，點解可以支持一班視狗命為垃圾嘅警員？我睇唔透。

是咁的，我叫 A，之前留意到隻獒仔流浪咗個幾月，知道有義工跟緊。但眼見成個幾兩個月都唔知點解狗狗仲喺山上流浪緊而無人帶佢走，所以決定動身上山搵狗，結果搵咗十次有多，佢都同我玩捉迷藏。有一晚，突然見到有車版嘅朋友話隻狗仔出現咗，機緣巧合下識到一齊救狗嘅 B 。其實，作為一個有常識嘅義工，應該知道咁大型又被誤解為窮凶極惡嘅犬種，一出世就注定連流浪嘅權利都無，應該盡早將佢帶離現場再處理。可惜佢又的確係流浪咗幾乎兩個月。

第二朝，我有嘢做行唔開，但朝早6點已經見到有車友不停話有隻獒係山，亦見到唔少救狗GROUP喺度廣傳，我已經知道狗狗必定出事。所以叫咗 B 有理無理打咗去 SPCA（愛協）同漁記備案話佢走狗，所以非常慶幸嘅就係一有消息，佢哋就會馬上通知 B。 由於 B 當日要下午先得閒，所以我馬上通知咗幾位狗義工同埋識狗義工嘅人，睇下有無人可以幫手上山睇住狗狗唔好畀佢走甩，或者唔好畀人捉走。點知義工們嘅回覆都不得要領，一係就唔覆，一係就下午6點幾斯斯然覆句：「你講咩？」

不過狗狗都好醒目，當日一見 SPCA 或漁記人員，就自己匿埋，所以日頭時間畀人報咗十次有多，佢都無被捉走。好景不常，半夜兩點幾 B 收到 SPCA 電話，話有人報話隻狗好惡要咬人，好危險。結果 B 當晚同咗 SPCA 上山，陪隻狗狗坐咗成粒鐘，SPCA 職員都無奈表示報咗咁多次，呢次仲話咁有攻擊性，佢哋點都要做樣。

喺捉狗過程，佢好乖，畀人摸，好跟人，完全不需要用到暴力。亦因為愛協職員當晚所見，佢都應承寫報告時會寫隻狗非常乖，了解情況後都寫咗 B 係狗狗嘅 second owner，話搵到狗主棄養或兩個月後就可以領養走。

自愛協捉咗佢，一直都好好，佢哋每做一個 step ，都會打比 B 交代一下。

但後尾為咗要檢查晶片主人資料，不得已 pass 畀漁護署。期間，B 每星期都會打一次電話去追問新界北漁農領養部李小姐，同要求探狗狗，但佢都拒絕同官腔回覆：「狗狗仲好好，我哋安排咗獨立房畀佢，寄咗掛號信仲等緊主人回覆放棄狗仔，先可以比你領養。」B 亦有問咁要等幾耐，佢話主人唔回覆都要等兩個月，先當主人自動放棄狗狗。直至10月8號打去追問時，答案都係一樣的。

不過去到10月14號嘅時候，我哋見差唔多到期限，同埋又有幾位所謂知名救狗義工提起狗狗，就馬上追問漁護而家個情況。

10月14日，B打去比李小姐，都一樣得到官腔式答案，不斷追問下，佢認咗獸醫判斷「狗狗有攻擊性，不宜領養」及「主人唔回覆信」上報咗去總署，話等文件落嚟，不過佢唔承認狗狗已被判死刑，話仲等緊主人回覆，因未夠兩個月。我哋不停搵機構出面幫手，分別搵到愛協，HKDR，NPV 三間機構肯出面幫手。

10月15日，聯絡唔到領養部李小姐，其他同事亦話答唔到我哋。直至4點鐘（佢哋4點半收工）領養部李小姐聽電話及答話：「今朝隻狗已經打咗針啦喎！」我重覆問咗佢幾次，佢只話：「我都無辨法，我跟文件做事！」就收線了。當我冷靜過後，再打去希望要求要番狗狗屍體，已經無人接聽。

10月16日，朝早打去，佢話屍體已經送咗去堆填區處理。

漁護領養部李小姐一直用689答話方式回應我哋，同埋狗狗嘅生死都只係一男子決定（新界北狗房獸醫Jason Chan）。

故事就講到呢度。本身都好難相信愛動物嘅熱心人士會唔相信公義，因為動物權益向來都被剝削，但而家真係肯定了，原來真的有動保人親建制。事實上，要維護動物權益，首先要由人權出發；要爭取人權，就要由政治入手。當一大班所謂的動保人士喺呢次社運裡面，無限量支持警方「執法」，覺得打人都無問題，中央政府無限好嘅時候，佢哋就注定搞一世動保抗爭都係失敗。仲有一大班人，連狗毛都未救到一條，已經爭先出來搶先收割光環。

一個越來越中國化嘅政府，連民生都唔會著重，仲點會理貓狗嘅性命？動保人士們，如果今日嘅你仲覺得「班學生抵死、犯法，打死佢哋都係抵死！」嘅時候，其實，漁護一樣咁諗，狗仔凶我，我打針啪死佢哋都係抵死，大家都係「依法辨事」。

動保人士一直要推翻嘅並唔係漁記嘅員工，而係漁護處理動物指引，甚至係整個香港過時嘅動物相關法例。面對一個越來越極權嘅政府，面對住無數嘅功能組別為惡法護航，爭取動物權益真係出來叫兩句口號就能成功嗎？

人權都維護不了，唔好學人講動保。呢樣嘢同你搵溫家寶傾政改（根據某高質5毛指示，佢係叫我搵溫家寶的）一樣咁荒謬。

共勉之。