大概沒有想過，大學畢業，做份文職，乖乖地都會被拉。

「細時唔讀書，大個做運輸」大概係我懂事以來，記憶中爸爸講得最多的話。他八九十年代做中港貨櫃車司機，日日兩邊走，見盡當年港人北上設廠的風光、見盡當年港人魚翅撈飯的氣焰、見盡「上面」的潛規則，識做的司機破財擋災，手緊或硬頸不肯「派利是」的，會被關員玩殘，甚至掟入派出所。乘著經濟起飛，他賺了不少，養起一頭家，但也在九八金融風暴、零一科網爆破中蝕了不少，近年港資廠息微，中國成本暴漲，見盡兩地的墮落。上兩年，因年紀及供求問題，沒有再揸貨櫃車了。

從小，他都訓勉我不要行差踏錯，讀好書、做好工，最緊要生不入官門，無謂惹上官非。

雖說沒有父幹，沒有中國背景，在現今社會難以找到好職位，但畢竟我都好上進，當初見HKTV大展權腳，我充滿理想入職，怎想到，政府叫王維基搞電視，到最後一男子唔發牌？

無奈要轉工喇，一開 JobxDB、LinkxdIn，見 Uber 請人喎。Uber 請幾多職位，我心諗，會否都係當年科網股爆破咁陽春？話曬零一年爸爸蝕咁多，科技嘅野，我呢啲廢青，都係小心做 Research 先。

一見，政府任何事都話要「創新科技局」，咦，萬能 Key 過「土地供應不足」喎，創新梗係重要喇；
再望，國際企業喎，重好疊水添，外國都處理曬法律同保險問題；
三睇，嘩，投資推廣署推介過，政府支持實冇死啦，即刻申請先！

有幸入 Uber 改變世界，令大家交通更為方便，早排還見到的士聯會曲線宣傳令更多人下載個手機 App，我坐在長沙灣辦公室，梗係最高興啦。

怎想到早上警察放蛇，拘捕司機，傍晚就殺上辦公室拉人封舖？我同兩個同事都不其然想起黃子華：「搵食嗟，犯法呀？做 Uber 都拉？」

在警署通知爸爸，離開時上了他的車，他說：「點諗到，現在的香港警署，像二十年前鄰國的派出所？現在的香港政府，叫你搞電視但唔發牌，要你夢碎；支持你搞 App 但又拉人，搞科技局還不如搞鍋科技生態，仲點信政府？仲點教細路？老人家都要適應社會潮流啦，霸權真係做壞榜樣！」

然後他就開車，準確點說，是一架搵食車，自上兩年沒有再揸貨櫃車，爸爸揸了一年的士，頂不順行業污煙漲氣後，就轉自顧，車上有部手機，除了 Uber，手機上還有個鄰國叫車 App，大概，現在只有鄰國的才「更平等」。

（本故事純屬虛構）