阿舜？邊個阿舜啊？《娃娃愛天下》嗰個啊！

以前要紅，就要做得好。行業之中最頂級，最傑出嘅人，先會有機會紅。例如你係歌手，就要唱功了得；你係舞者，就要跳得勁。你係演講，就要講得叻。

然而，今日要紅，就簡單得多，只要夠「騎呢」。就算你再不倫不類，都可以喺網絡世界一炮而紅。你有你睇鍾嘉欣，但係有人愛魯芬！當你以為人人都愛美食嘅時候，最紅嘅餐廳卻叫做明將......

十年前行路行到成隻殭屍咁嘅麥浚龍，今日都可以靠謝安琪嘅羅生門彈番起身，突然搖身一變成為香港嘅實力派歌手。（呢篇文預咗得罪好多人...）

阿舜消失十多年，突然出現，舞技不變，唱功依舊。但得到的待遇卻和十年前截然不同。網上同樣是瘋狂洗版，卻是一致叫好，受大眾擁戴，仿如勇者重臨大地一般。

這一系列的事件給我帶來兩個反思。一，今時今日，要出名，真係太容易。首先，你唔洗做得好。基本上，只要你敢做，又唔怕有機會俾網民圍攻，你一定出名。你試諗下，阿舜都上到報紙C1，你只要跳得好過佢，唱得好過佢。你有咩理由唔出名？

你唔再需要有好好嘅朗誦技巧，你今日今時要出名，你只要有特別的朗誦技巧。你可能會覺得，唔係喎！咁係出名被人笑啫！阿舜呢個例子正正話比人聽。就算一開始比人笑，今日出番嚟，大家咪又係激稱讚佢堅持、勇敢、正面。今日仲笑佢嘅人，反而突然間成為網民圍攻嘅對象。阿舜話你知，這是一個人人都紅嘅年代。

但是，這是最好的時代，也是最壞的時代。因為，二，今時今日，已經無辦法定義咩叫紅。

以前要判斷一個人出唔出名好簡單，因為過去可以曝光嘅機會唔多。當你可以喺媒體經常出現，你就係紅人。反之，你就算做得幾好，得唔到曝光機會，都係寂寂無名。到咗今日，你要曝光，實在太多機會。只要自己開個 YouTube，或者 Facebook。近乎零成本，就已經可以接觸大眾，能夠聚到自己嘅支持者。

但今日，所謂嘅紅。可能就只不過係講緊一個星期，甚至一日。一炮而紅，卻也一炮沉淪。而家要等大眾認識你，唔再需要爭取主流媒體報導。網上資料好似洪水一樣，熱爆嘅速度甚至可以比主流媒體更快。往往喺網上炒起咗一個人，新聞再去跟進番。

但水能載舟亦能覆舟，網絡可以一秒令你爆紅，但一旦下一秒有更爆嘅人，你就會立即喺下一秒消失得無影無踪，仿佛從未出現過一樣。喺呢個資訊洪流之中，由網絡所產生出嚟嘅「紅人」，又可以紅幾耐？

這是一個追資訊量的年代，每個人都在追。要紅，好容易；要keep住紅，反而更難百倍。