我校有一個已經 Repeat 咗一年嘅中一生，今年佢又升唔到班喇，家長諗住要佢 Tripeat。

小朋友就好唔開心，佢初入讀嗰陣，班同學已經升上中三，家長仲要佢留喺中一。佢讀書問題係英文完全搞唔掂（我校係英中），所以用親英文讀嗰啲科都肥佬（例如英文、數學、科學、歷史、地理等。。）今日校方就搵曾經教過佢嘅我去打怪獸，同佢家長傾下轉校問題。

我：其實家長有冇諗過轉校？
家長：我上年咪講咗囉，其他 Band 1 OK，Band 2 就一定唔轉。

我：其實 Band 2 有咩問題呢？（心諗。。。咁嘅成績 Band 2都未必收）
家長：讀 Band 2 咪即係做垃圾筒？

我：下。。。
家長：叫我個仔著住 Band 2 校服，個校徽成個垃圾筒咁。

我：間間學校校服校章唔同嘅。。。。。。。。。　
家長：總知唔係 Band 1 我都唔考慮，Band 2 係垃圾筒，Band 3 係堆填區。
（咩垃圾筒又咩堆填區。。痴咗線？）

我：但係小朋友喺呢度真係跟唔上進度喎。
家長：咁呢個咪你哋老師責任囉，而家俾夠第三年你教我個仔中一課程，咁都搞唔掂你哋咪喺 Band 1 教啦，全部送去垃圾筒堆填區啦。
（咩叫垃圾筒堆填區？？？？？？？？？）

我（轉個角度先）：其實小朋友都向校方透露過，佢想轉去其他學校，較易適應喎。
家長：我寧願佢喺一間 Band 1學校嘅中一班房做三年垃圾，都唔會俾佢去 Band 2做垃圾筒，去 Band 3 做堆填區，阿 Sir 你明唔明丫？
（唔明，我分唔清垃圾、劉江華同堆填區）

家長：俾人知我個仔唔係讀 Band 1，我邊有面出去同街坊飲茶，新年帶佢出去拜年丫？阿 Sir你明唔明丫？
（ ＿　＿　＿　我真係完全唔明，家陣佢係你個仔定係你個花樽？）

後記：收到網友 PM 話讀書時，見過有同學喺同一個班級留超過3年。。。