點解唔敢貼返金鐘 Last Day 的傷痛理由，唔提猶自可，講起三把火。（唔記得有無講過）

……屌佢老尾，嗰晚情形，直情年宵晚會咁樣，Last Day 去影相打卡趁墟心態。啲村民嘻嘻哈哈，不但可以煮飯仔、打甂爐、金鐘自修室慶生 BBQ 都出埋，臨別秋波成班市民排隊拎嗰條乜鬼黃色皮帶仔排到兩三點都重 Keep 住條隊有50人輪。

去到半夜，重有人離譜到玩閃粉玩到灑喺地，畀人訖重成班惡爺敢死兇返人轉頭，差啲要講手打人，對黑警又唔見佢哋咁惡，啲和事老同「糾察」就不問是非係咁講唔好分化乜乜七七，根本就係夾埋做戲。事後重喺度講嗰啲不忿開 Party 嘅路人係鬼係挑釁攪事。

還有就是，許多村民好似後生仔女去完一場 Camp 咁快樂地收拾細軟，不知人間何世。七零八落的頭盔、雨遮、眼罩等防具散落一地無人收拾，與在場許多嘔心虛偽的「We'll be back!」標語創作，相映成「趣」，諷刺得很。

到第二朝早，就係泛民學聯同社運友黃絲帶圍威喂集體被捕時間，由佢哋懶懶閒集合到埋位就位到嗌吓咪等被拉，我一一目睹。但新聞報道大家有眼得見的，祇係佢哋被捕的「悲壯」。所以謝偉俊同一班警未去到佢哋條「前線」清場拉人嗰一刻，忍不住身心崩潰，斷然離開呢片傷心地。

快樂抗爭，永續社運，公民覺醒，政治啟蒙？咁樣樣，三隻蝦。

（原文載於作者個人 Facebook）