近年主流傳媒經常報道80-90後嘅「成功」故事，標榜主人翁好年輕就成功置業上車或高薪厚職等等。其實一直以來，呢類故事都係香港嘅社會主導價值觀，而主流傳媒及父母就係呢種價值觀嘅建築師。

主流傳媒會將一套社會主導價值觀加諸年青人嘅個體價值觀之上。經過時間嘅潛移默化，年青人會相信只要努力讀書，畢業後搵份好工，然後努力工作儲錢，就畀到首期買樓上到車。依附呢種社會主導價值觀嘅個體會特別穩定，但如果有一日佢發覺讀書成績好嘅結果並非等同高薪厚職（因為機會已預留畀有某種關係或身份嘅人），努力工作儲錢但連首期都畀唔到（樓價升幅已遠遠超越薪酬升幅），社會主導價值觀就會崩壞。

年青人嘅反抗愈來愈大，社會愈來愈難以管治，就係因為社會主導價值觀崩壞，而社會又無法成功培植另一套主導價值觀作填補。近年主流傳媒經常大做80-90後「成功」故事嘅文章，就係意圖重塑呢種主導價值觀，但可惜全部失敗。

呢種價值崩壞嘅情況並非只出現於年青人身上，喺成年人身上亦逐步浮現。日前居屋有12萬多份白表申請，但只有864個單位可供選擇。好多白表申請者都係成年人，佢哋會開始質疑潛移默化嘅社會主導價值觀：窮半生心血精力嘅結果，竟然係一個近乎六合彩一樣嘅機會！

喺60-70年代成長嘅人都有一個信念，就係只要肯捱就養到家，最後呢班人身體力行引證呢個信念，讓呢種社會主導價值觀得以傳承至下一代（即係我哋）。但去到呢幾年，你仲會對呢個城市抱有何種信念？你仲會相信哪種社會價值？如果你無法搵到自己嘅答案，而又發現身邊嘅同輩都搵唔到答案，咁就香港嘅真正問題了。

（本文原載於作者面書）

（東網電視截圖）