筆者今年同各位應屆考生一樣，都正在夜以繼日咁挑燈夜讀。雖然我未考小組討論，但喺校內小組討論成績都總算係頗高，咁當然離不開我平日關心時事，同睇《毓民踩場》，令到我學咗唔少理論同古語，方便我在討論當中引用例子同引經據典。
例如有一次討論題目為「有人認為禮物是潤滑人際關係，有人認為送禮是功利主義，你有什麼看法？」
我嘅答案係「潤滑人際關係本身就是功利性質。例如湯顯明和中國官員酬酢，送贈茅台，結果被人質疑是賄賂共官，以取政協之位的嫌疑。可見以送禮作為潤澤人際關係的手段，本身就係功利主義嘅行為。」我關心時事，結果隨手拈來了一個例子，令論述完整、深入。
而我去到駁論部分，發言就更加突出啦：「湯顯明說自己送禮的行為是禮尚往來，不是功利的體現。但『禮尚往來』、『禮多人不怪』的本意並非如此。禮，本是指規範人行為的準則。禮尚往來，指要禮貌待人，就不會出現尷尬的場面了。所以『禮』根本唔係指禮物。作為一個廉署專員，以禮物去潤澤人際關係而不顧法理和身份，則不是禮尚往來，而是禮崩樂壞。」
我講完之後，先生大喝精彩，仲讚我有學養。殊不知，我係拾黃毓民牙慧。呢段嘢毓民喺立法會講過 XDDD
但未睇或者少睇毓民發言嘅朋友，點算好呢？〜〜〜〜〜
咁又唔好咁驚住，雖然你哋執輸，但都未至於冇得返生。因為我有特別嘅說話技巧（≧∇≦）！
以筆者嘅經驗，要喺小組討論度爆seed，一分鐘首輪發言極其重要。呢一分鐘，決定了你喺考官心目中嘅最初印象。咁要考官眼前一亮，就一定要一個出人意表嘅「界題」。
比如啱先嗰條題目，我要首先喺首輪發言就界定咩叫「禮物」，
搞清楚送禮物嘅初衷係乜嘢先：「禮物係為咗表達對對方的祝福和愛意，是不求回報的。如果送禮係用來潤澤人際關係，咁就不是送禮了，而係交易，或者賄賂。」
界題界得靚，可以令整個討論由你唻主導，並且留下深刻考官深刻嘅印象，而佢會「先入為主」咁，對你之後嘅發言予以高嘅評價。
再譬如題目：「對於比賽，我們要着重參與，而不計較成敗得失。請評價這個看法。」通常很多同學甫開口就話「不同意」，理據往往係話「成敗得失都十分重要」。
但如果識界題嘅同學參與該討論，便可秒殺，出奇制勝了：「我同意該看法。不計較得失，是否等於我不重視、甚至乎忽視佢？當然唔係。計較，指執着。你執着結果，就會患得患失，不但會影響發揮，更會令你在賽後埋伏心理遺患。箇中的問題，我會過後再詳述。而我嘅立場，就係同意題旨，珍視過程，正視結果。」
所以你話，界得個題目好，就可以鶴立雞群，立於不敗之境地。但點樣界題先為之好呢？下一篇文章再仔細啲講，且會根據呢幾日嘅試題加以討論。
（圖片來源：迦密主恩中學）