星期日晚（2月25日）英超本來上演「三料娛樂」，頭場為水晶宮對熱刺，之後有曼聯對車路士，壓軸有阿仙奴對曼城。不過尾場對賽組合剛好齊齊殺入今晚的英格蘭聯賽盃決賽，賽程毋須大改動，只要將原先的英超賽事壓後都星期四晚就解決。

香港球迷向來都關心英格蘭足球，不論是英超、足總盃及國家隊賽事，當然會汁都撈埋，聯賽盃亦不會錯過，奈何今次這個重量級決賽戲碼，竟然沒有香港電視台直播，嬲到震。

未知是否因為皮費太重，近年本港的電視台已經逐漸放棄英聯盃的直播，上屆初段比賽全線無得睇，到曼聯對修咸頓的決賽，有線電視都是賽前數日才宣佈有直播。今屆賽事的戲碼其實更強，當大家期望有電視台險簽播影權時，去到最後一刻都無聲氣。

當然，相信此文一出，必定有留言指「上網睇咪得囉」，我夠知網上大把選擇，但當你每個月付上數百元收費電視月費，都無法安安定定，毋須左click右lag，去看一場重要的盃賽決賽，有時真的覺得香港人很可憐，再看看，原來隔離埠有直播，真吹漲。

還記得千禧年初，兩舊水，可以看齊歐洲四大聯賽、各重要盃賽、世界盃及歐洲盃毋須再額外收費。現在屋企的收費電視盒愈來愈多，每個月交足月費，皮費多了一倍，更要給家人投訴拉到一屋都係線，原來都可以有重要賽事走漏，難怪愈來愈多人上網睇波。