今屆香港寵物展，為慶祝十周年紀念，主辦機構 Exhibition Group Ltd 搵到贊助商Arrowana International Ltd.（即寵物糧食 Almo Nature 的代理商），搞咗個「門券慈善回收活動」，從宣傳海報上得知，各入場人士，只要保留票尾並投入各慈善機構展位之收集箱內，主辦機構 Exhibition Group Ltd. 就會捐出1元畀有關慈善團體，而贊助商 Arrowana International Ltd. 亦會捐出同等價值產品。作為香港註冊嘅慈善團體，香港群貓會真係滿心歡喜，以為自己係受惠機構之一。

寵物展開 Show 第一日，已經有好多支持者將手上嘅門券交畀群貓會義工，當時已經聽到好多支持者話門口有人搶／呃票尾，我哋都好不以為意。

然後到開 Show 第二日，亦即是情人節當日，當時貓會負責人唔喺度，大會就走嚟冷冷咁抛低左一句：「你哋唔係慈善團體，唔可以收票尾。」

到最後一日 Pet Show，負責嘅 Sales 走嚟搵群貓會嘅負責人，正式通知群貓會唔係受惠機構，原因係我地喺 Commercial Booth Zone，而非傳統嘅慈善團體應該進駐嘅 Free Booth Zone。一招大石壓死蟹，群貓會真係無從還擊，雖然後來好多人仍然畀票尾我哋，我哋都唯有無奈婉拒。。。散場時望住一箱代表住貓友們支持嘅票尾，確實欲哭無淚 T＿T

到底，係咩原因令到群貓會未能成為受惠機構呢？咁就要同大家剖析一下主辦單位精湛嘅語言偽術。

首先，大家可以留意番大會嘅宣傳海報，上面係清楚指示咗大家將票尾放入「慈善機構展位」嘅收集箱內，嗱嗱嗱，呢個就係最關鍵嘅語言偽術喇！呢張海報係無英文版嘅，作為一個普通嘅愛動物人士／參觀人士，又斷唔能喺中文版中提及嘅「慈善機構展位」一詞，去理解到主辦機構對慈善團體嘅個人闡釋。不過，作為一個有畀錢去租用展位嘅慈善機構參展者，群貓會就可以解釋一下背後嘅運作，以及我哋 Get 到嘅潛台詞。



首先，喺 Exhibition Group Ltd. 主辦嘅 Pet Show 中，係有一定數量嘅 Free Booth。呢啲免費攤位，根據個 Sales 講係名額有限，而每次主辦單位都會優先去問上一次參展過嘅慈善團體，如果有人話今屆唔玩，先會放番個展位出嚟俾其他慈善團體輪候，而呢個輪候期應該會長過輪公屋（因為正常地免費嘅展位，唔會有團體拒絕吧？！）咁大家會問，佢哋用咩準則去邀請慈善團體入 Free Booth Zone 呢？啊，呢個我都答你唔到，因為心水清嘅會知道，當日喺慈善團體呢個 Free Booth Area 裡面，係大大少少嘅機構都有。

咁既然 Free Booth 輪候唔到，但又想多啲人認識，同埋宣揚群貓會主張嘅理念，咁逼於無奈，群貓會都要接受畀錢租 Booth。不過，一畀咗場租，身份就有大改變，因為喺主辦機構眼中，畀左錢就係客仔，屬於 Commercial Zone，咁就唔再係慈善團體喇！！！

哈哈真係估唔到，我哋呢個無奈的屈服，係會為我地帶來屈辱。

十分荒唐地，就係因為我哋無辦法享受免費展位優惠，寵物展就可以單方面去否定我哋係慈善團體，縱然有幾多好心人將票尾留咗畀我哋，佢哋都唔會承認群貓會係可以受惠。為此，群貓會感到荒謬和憤怒。

而且，憤怒嘅唔止我地一個，仲有支持我哋嘅一班熱心貓友們。

謝謝貓友 Tom 為我們預備了一封投訴信，分別給 Organizer 和贊助商 Arrowana，投訴主辦單位嘅不公平，並且要求主辦單位同贊助商履行佢哋嘅承諾。

如果你支持呢件事，請你哋幫手將你嘅想法話畀主辦單位同贊助商知。

主辦單位 Pet Show電郵：marketing@petshow.com.hk

贊助商就有關活動連結：https://www.facebook.com/AlmoNatureHK/photos/a.959130504098444.1073741825.220321484646020/970153269662834/?type=1&theater

主辦單位活動連結：https://www.facebook.com/petShowhk

投訴信參考：
https://www.dropbox.com/s/el4t12l2njfhxjg/To%20organizer%20-%20Complaint-Letter-as-a-Paying-Customer.txt?dl=0

（香港群貓會於2007年7月成立，並於2007年10月1日起成為香港特別行政區認可之註冊慈善團體，宗旨是保障貓隻的權益，多方面推廣人與貓在社區和諧共處的信念，教育飼養貓隻的正確觀，並透過領養或絕育有效控制流浪貓隻的數量，以及避免任何不人道對待貓隻的情況。作者Elaine Chan為香港群貓會幹事）