我其實真係好鐘意睇電視架，冇得睇電視真係世界末日，我會猝死架。馬年一開始，忍唔住想講下亞洲亞洲。

其實歷年來，亞洲亞洲都好出色架。佢嘅好睇之處在於佢真係荒謬到，你永遠都估佢唔到，有時真係會忍唔住講張家輝個句：「XXXX，亞視嚟嘅！」

亞洲亞洲有幾荒謬？
-->可以叫陳啟泰做哂所有綜藝節目的主持，May姐黃麗梅又可以做哂所有美食節目的主持，呢尐咪好似學校尐專科專教咁囉。
-->可以舉辦一個無年齡限制的選美會，而最荒謬的係，又估佢唔到真係會有個宮雪花咁嘅人參加。近年仲請花姐教2013年亞姐選美心得。
-->可以因為《還珠格格》收視好，有廿幾點，佢可以一日播4次，但我又真係比佢吸引到我一日睇哂4次。
-->可以用六合彩節目谷收視，將六合彩化身黃金時段節目，再邀請夏春秋出山返來做主持。
-->可以連播兩集你睇一集都頂唔順嘅《恩雨之聲》，再播個馬上全接觸，教完你信教，下秒又引誘你賭博。

當全個世界的人都覺得亞洲亞洲求其播尐野出來hea 到2015，佢尋晚又再次不負眾望的發揮佢「離哂譜」的精神出來，大年初二，香港燒煙花，TBB當然係直播煙花盛況啦。



我轉一轉台，睇下亞洲亞洲有咩新年驚喜，你真係估佢唔到架，亞洲亞洲竟然播返24年前，1990年的煙花盛況，我真係從來都無諗過煙花都可以睇重播架。最估佢唔到係，佢又真係唔係離譜得哂，佢又真係搵返1990馬年的煙花比你睇，等你都不至於話：「都唔應景嘅！」仲要為咗將個節目拉長，佢竟然播放埋準備煙花的片段，包括將尐煙花放係隻船嘅排列，同埋訪問埋準備放煙花嘅員工，你真係估佢唔到。

先幾日，有個博客稱讚澳牛的員工有「當尐客係死嘅」嗰份霸氣，我諗澳牛的霸氣係點都唔及亞洲亞洲架。澳牛你都要入去食，你先feel到個份「當你死嘅」服務態度，亞洲亞洲係只要你唔覺意hi到個電視remote，你就即時感受到「你都係路過嘅啫」的趕客mode。

轉一轉台，亞洲亞洲真係帶俾你無限的驚喜，你永遠估唔到佢有幾離譜架，我真係好想知尋晚除咗我轉咗去睇1990年煙花重溫，仲有邊個有睇？

其實亞洲亞洲都曾經有佢輝煌的時候架，《大地恩情》、《肥貓正傳》、《我和疆屍有個約會》、《我和春天有個約會》、《再見豔陽天》、《飄零燕》、《撞到正》、《我來自潮州》、《萬家燈火》等等。

其實我真係比咗好多次機會你架啦亞洲亞洲，我真係會睇架如果你做得好，但你真係迫到我哋走投無路，點解你會咁架？

新年流流，TBB同ATV都不停播埋尐無謂野，我係咁係屋企睇電視，梁振英個廣告就係咁閃出來叫我幫尐弱勢社群，我之前寫信去俾局長請求佢加多個電視台，佢又唔show我地尐小市民，有時，係又反你唔係又反你，都係你迫我架咋。


（本文原載於作者面書專頁。）