今晚已經係我第五晚搭夜的返歸：即係一星期連開五日OT。

我今天帶著殘留的驅殼上車。特登絞低車窗吸吸久違嘅新鮮空氣。望出窗外，諗起此時此景。都唔知為誰辛苦為誰忙。

____________________________

回想當日放工路經金鐘，睇見班細路半夜三更都仲要喺街訓咁慘，咪諗住留喺現場陪佢哋。

「不如我辭職陪你哋佔領。」聽完佢哋嘅理念，我忍唔住話。

殊不知班後生仔耍手擰頭、起勢話唔好，佢哋話「搞活動佔住條路，影響到你哋返工搵食，我哋已經勁唔好意思。一係咁啦，你都可以出分力呀：你返工搵多啲錢，然後再喺背後 backup 我哋，咁咪仲有意義！」

我嗰刻深受感動，立志決定要喺經濟上支援班學生﹗

估唔到，就喺我搏命OT嗰幾晚。金鐘被清場，周永康喊住唱《撐起雨傘》，一個個坐喺度被人抬，話要跟著劇本走。

然後我喺 Facebook 見到金鐘清場嘅相：一張係一堆棄置頭盔嘅相，另一張相片係被充公放喺角落嘅一大堆物資。我心裡面有個疑問：到底係咩時候開始，矢志要包圍立法會、一群要抵抗警察警棍侍候嘅留守者，要放棄抵禦、甚至放棄保護自己，手拉手坐住等被帶走？而眾多志願者捐來的物資、留守者全力守護、節約住嘅資源，到頭來都用唔著。一堆堆物資，到頭來被掃走、充公，我望著足夠可以留守千日嘅物資，仲有防守配備、頭盔同手製盾，就好似望著自己嘅支援，最後喺一場未打過嘅仗斷送一樣。仗都未打，已經有人開城門投降，放下頭盔釋出善意，無血開城──又唔話得係無血，因為留守者嘅血已經流咗……

____________________________

思想飛到萬丈遠，落地諗起生活除咗埋首工作再工作，就只有關於雨傘運動嘅 newsfeed。索然無味。想再融入生活，學下達哥同的士司機笑談生活趣事，卻發現自己生活窄到連做開場白嘅話題都無。

無理由同佢講雨傘運動架。萬一佢係藍絲我怕我屋企都返唔到。

「呀…… 司機，呢個鐘數多唔多客仔幫襯 ?」最後我都擠咗一句好行貨嘅開場白。

「唔多架。不過最近載多咗啲後生，話去完『鳩嗚』返屋企喎……」

「哈哈，估唔到班友又真係促進咗香港經濟。」嗰果一刻，我見到佢講嗰刻望一望倒後鏡，想睇下我聽完會唔會黑面，然後就花足半粒鐘鬧班「廢青」點阻佢返工返早半粒鐘。

我嗰刻無出聲。正確嚟講係出唔到聲──居然當正司機係藍絲。

勢估唔到，我睇錯咗人，仲睇得好錯……

____________________________

落車嗰果陣，我夾多咗五舊水畀佢。

「本來我做生做死，都係為咗舊錢幫班學生，當自己都出分力。而家場運動都完咗咯，見你都算係同路人，不如畀多啲貼士，當益自己友好過。」

司機低頭搲幾個碎銀，然後將找續連五百蚊遞返落我手：

「傻啦，啲錢你袋返佢。與其將啲錢塞畀人令自己良心好過啲，咁點解唔諗下自己可以參與多啲？張贖罪券你袋起佢啦。」

最後司機揼恆油走人。我望住的士嘅背影，好似諗起有啲嘢未做……硬係覺得好似有啲嘢未買咁。

（圖片來源：eefeewahfah via Flickr）