一、星期日長毛喺旺角比市民包圍問佢拉唔拉布，佢答話「毓民成日拉布都唔喺度，講嘢。」言下之意，當然係話毓民無乜拉布啦，長毛忍咗毓民咁多年，終於爆了。查實咩叫拉布呢？ 

二、想喺香港立法會發起拉布，好多時都要提出大量修正案，再就修正案內容發言。毓民一二年反《2011年版權（修訂）條例草案》、替補機制法案、五司十四局決議案拉布嗰陣，係先就版權條例、替補機制提出大量修正案，癱瘓立法會秘書處，結果令版權條例無法喺會期內提上立法會大會。到審議替補機制嗰陣，毓民就自己所提既修訂不斷發言，解釋點解改條文啲介詞都講咗幾個鐘；中間又響吓鐘傳召議員造成流會，搞足幾個星期，最後迫到主席要夾硬剪布。之後再有其他法例攞上會審議，例如公司法咁，毓民再不斷就條例內容發言，結果令五司十四局無法攞上立法會大會，「火燒連環船」，拉布先叫做有個最後勝利。 

三、今次《2014年版權(修訂)條例草案》，政府加入豁免條款，聲稱保障咗二次創作既權利，不過刑責部分仍然係會妨礙網民既言論自由既，成個草案既概念，其實一般人唔易掌握。毓民參加咗法案委員會，同政府就「安全港」、「合約凌駕性」等環節討價還價咗好耐，都令法案委員會遲遲埋唔到尾。法案委員會開完之後，毓民覺得條例中文寫得衰之餘，一定要加入關於「安全港」、「合約凌駕性」既條文，於是提出903項修正案。因為立法會秘書處要多兩個禮拜先處理到，所以條例已經係拖後咗兩個禮拜先上到大會。而家比主席裁剩42條，有啲泛民議員話要加入拉布，包括長毛，佢地重可以點拉呢？ 

四、長毛連法案委員會都無加入，其他法案委員會入面既泛民議員，開會都無乜講野，睇嚟佢地對條例都係一知半解。無加入法案委員會既議員，係可以提修訂的，不過無入委員會既泛民主派議員都係無去提，要拉布唯有就嗰總共幾十條（包括政府同法案委員會主席陳鑑林所提既）修訂發言。 

五、長毛幾次財政預算案拉布，發言成日離題萬丈，好多次都差啲比主席禁止發言，今次版權條例咪最多發言搞吓爛gag、響吓鐘，再同外面講自己有份拉囉。如果泛民主派，呢兩日開夜車讀熟個條例，星期三不斷發言，可能仲有啲搞頭既。