有位「資深」時事評論員看完何韻詩演唱會感動流涕，立即寫鴻文讚到天上有地下無，又說甚麼connect又disconnect，又說是甚麼「本土音樂革命」……唔講，讀者以為香港沒有本土音樂。

阿評論員，小弟睇show資歷相對算淺，最多去過日本live house追當地大band，連Glastonbury都未去過認真無知。對睇show呢，就淨係識用「勁唔勁」，同埋「好唔好聽」去形容。玩得勁嘅，咪跳得high啲囉……忘記了，香港大部分主流演唱會是「坐低」聽的。新伊館的演出亦如是。

當然，睇show評審眼光不同，正如2002年睇Kelly《飛天舞會》演唱會，同行麻甩朋友睇人個胸唔睇set design，所以聽歌聽到神經線connect又disconnect，又有何出奇呢？

至於本土性呢……何詩姑一腳踢搞演唱當然值得敬佩，但是否如你老人家所言咁革命性，就有相當大保留。容小弟一問，唔知你有冇聽過維港唱片呢？又有冇聽過街聲呢？再顯淺一點，有冇聽過My Little Airport呢？

可能你中產出身，非紅館SHOW，非外國樂團演出就例必唔去，但本土樂人苦苦經營，就絕不能抹殺。

香港本土indie music scene，音樂會近乎每星期都有，上至大型live house performance下至busking，總有一show喺左近。本土indie 演出周街都係，絕非罕有。重點在於，你睇唔睇，同你睇唔睇到而已。

講香港本土音樂，70年代已經出現；而近代本土獨立音樂，如果以廠牌作為定義界線的話，一路數到原點，就不得不提維港唱片及AMK。

沒有AMK，沒有關勁松，就沒有90年代香港獨立音樂潮流，亦沒有日後維港唱片、22 Cats、Relaxpose及My Little Airport……等等等等。這班人不如HOCC有頭有面，沒有主流媒體支持，真正默默耕云。有MV冇電視台播，有Hit歌但極少DJ點播，有訪問但不在主題版面，他們日做夜做幾近白做，好在有心樂迷記得他們，indie人們才捱出頭來，在沒有主流的今天撐起半邊天。

My Little Airport呢？就更加要講。十多年來，他們的歌從未上過電視台，從未接受主流電視台甚至電台訪問，從不買任何電台及電視台AIRTIME，從不參加馬騮戲音樂節目，派往電台的歌曲少之又少，可播放的亦不多。沒有人力物力，由唱片封套設計到錄音等等全面一腳踢，演唱會前後期工作亦百分百自家完成，如此零廠牌、零商業、零人手的艱苦經營，到今天竟然紅透半邊天！論知名度，認識MLA的後生仔，分分鐘比當上日日在電視賣廣告的乜乜Girls還要多。至於MLA的歌曲主題有幾本土，都不用多說吧。

繼續數indie音樂的話，煩請讀者自查翻閱小弟的其中一篇舊文。

本土音樂一直都有人搞，何韻詩不過是後來者。但像她由大廠牌走進個人發展的，在香港又確實少之又少。HOCC很神，證明她撐得起音樂，不用看大商家臉色做人。

但評論員如將她的成功演出說成革命的時候，第一請先記住她本身的強勁fanbase、高知名度及媒體支持（至少有《100毛》）；第二，香港有好多有心本土音樂人，只是你看不見而已。

與其做隻井底蛙，不如少說話，多見世面，完。

（圖片來源：十八種香港HOCC 2015宣傳圖）