有人話，員工因公司而加入，卻因主管而離開。成日話後生仔坐唔定，太Jumpy，三兩年轉一次工唔上進，又唔諗吓幾多老油條冇料扮四條，死磨住個阿頭位又唔識管理（所以自己又冇得升），先搞到下面走夾唔抖，冇人做得長。呢個年代，垃圾阿頭，真係多到一個招牌跌落嚟都唔知耷死幾多個。

有啲呢，貪Fresh Grad人工平，但要求幾年工作經驗。請人出手低，但要十八般武藝，又要笑口噬噬，仲要人唔爭坐你個位。你估真係蔗渣價錢，就有燒鵝味道？請到番嚟，鬧人Hea做前，唔該睇你出幾多糧先啦，開得飯嚟又唔夠家用，一分錢一分貨呀！好喇，仲有同事勤力上進，博升職加薪啦，阿頭年年都信誓旦旦，話肯肯定會Fight Budget加人工，見部門唔夠人手，又應承加人手減輕工作量，點知轉個頭，對住自己頂頭又死狗咁，一年、兩年、三年，「成功爭取」，加嘅唔係人工，而係工作量，仲話下面同事工作量可以無限量增加？叫班𡃁又點信你呀！Shame！ Shame on you！You are dreaming on your office or you are not attend at your office？

又有啲，曲解Manage，管理，叫你管理部門運作，唔係管制奴隸。你返緊工仲專心炒股就天經地義，有鑊又卸搏，但鬧後生用Lunch Time炒iPhone，就係不務正業？Lunch Time係私人時間，不奉旨工作，我係位篤手機，你冇必要擰擰頭。

辦事能力，係睇人交唔交到貨，唔係一定要八面玲瓏，阿頭唔使迫我哋同所有同事（尤其上司，即係你）打成一片，因為太多人怕「扮工室政治」，多言多敗，倒不如專注工作，少啲瓜葛，你唔好咁「厚多士」話下屬寡言啦。

最怕仲有班，鍾意「隨口噏」，吹到大一大，但莫講話行動，自己連決定都唔夠膽落，最後求誅開會，再開會，不斷開會，連常識都要討論一餐，同一個Project，商討兩年都唔行動，仲要懶民主咁話投票，投完個結果唔滿意，又呀之呀左，所謂扮民主，咪又係「你民我主」，一事無成，偷笑的就只有對手。

一方面又話黃金年代自己陳年「威水史」，自以為「獅子山下」代表，另一方面怨後生唔捱得，請唔到平靚正奴隸，但又呻上面比好多壓力，咁唔掂，咪唔好做，退位讓賢啦！

（後記：我冇話所有阿頭都廢，如果你係都要對號入座，除咗恭喜，傲將軍都唔知講咩好。)

延伸：《上司是需要調教的》雲滴娘娘

（《半澤直樹》截圖）