昨日舉行的《城市論壇》，討論議題為「內地香港同祖共宗，求學旅遊怎教輕鬆？」期間主持謝志峰一句言論：「香港多普通話你咪學下囉！」，引起網民激烈反彈，陳雲更建議大家去信加拿大駐港總領事，投訴加拿大籍的謝志峰冒犯香港人。今日本台節目《熱血政治》主持黃洋達專訪謝志峰，謝直認自己為「大中華膠」，更認為只要有普選，香港人對粵普之爭自然沒有這麼敏感。

認同中港同祖同宗
謝志峰在接受訪問時，承認是他制訂昨日《城市論壇》的議題：「香港同大陸喺歷史文化上始終係同祖共宗。鴉片戰爭前，香港係中國地方，大家都係黃皮膚黑頭髮嘅人。我明白內地遊客多咗，令生活不便，加上爭取普選路上有諸多阻撓，加上近十年八載，生活質素下滑，不過我就仍然覺得中港係同祖共宗，所以起呢個題。」

黃洋達隨即指出：「鴉片戰爭之前，香港係屬於中國，但係嗰個係滿清嚟喎，依家呢個係中共喎。」於1962年由大陸移居澳門，再於一年後抵港的謝志峰就認為這樣不成問題：「朝代興替，並不改變我哋係中華民族、炎黃子孫嘅歷史。」

贊成普通話教中文
對於近期受到廣泛關注的「普教中」，謝志峰就認為語言最重要是實用性，更贊同以普通話教中文對寫作有幫助：「語言係生活上需要，邊樣嘢最方便你就用，對方明白及清楚係最重要嘅目標。我覺得要寫好中文，除咗要識廣東話之外，你仲要書面上嘅功夫，書面上嘅功夫最直接喺邊度訓練出嚟呢？就係普通話，因為普通話講到出嚟就寫到出嚟。」

黃洋達就覺得粵普之爭，並非單純因為香港人有怨氣：「我唔覺得係民眾嘅怨氣累積，需要搵一個出口，而係事實上喺政策嘅層面，我哋見到有一個消滅粵語嘅行動，而呢件事唔係只係出現喺香港，早兩年喺廣州就推廣緊。你會唔會對本土旗幟有妖魔化嘅引象？」

謝志峰認為只要針對性解決怨氣，文化衝突就可以淡化：「（普通話）已經咁普遍，有少少方言，咪俾佢囉，有乜所謂。（香港人）有冤屈我係覺得嘅，但係呢種冤屈要針對性解決，唔好將佢泛濫化。講到中國同香港唔同宗共祖，我就係意無反顧嘅大中華膠，覺得有問題。」其後他更將問題歸咎於政制方面： 「正正係我哋政制發展唔暢順，只要有普選，經濟政策對頭，香港人對粵普之爭就會冇咁敏感。」

不講廣東話沒所謂
黃洋達問：「假設如果有普選，大家都有錢賺，係咪大家都接受到將來立法，所有中小學用普通話教學，母語定為普通話，電視以普通話廣播？你覺得可唔可以接受？」

謝志峰：「語言係睇實用性，假如有種語言已經冇咗實用價值，自然會被淘汰。將來香港全面用普通話，我冇乜所謂。問題係當政者不適宜咁樣做，因為社會應該要包容。我接受到普通話，但唔代表粵語可以被受排擠。」

黃洋達就再重申本土派立場：「我哋唔認為係因為生活得唔如意，所以要搵一個發洩出口，我哋本質上認為粵語係需要保護，我哋立足點就係呢尐事本質上就係政治問題，但喺謝生角度嚟講，只要有普選，經濟順暢，民心歸順，粵語及正體字的正統性就係次要。」

真普選可淡化文化衝突
謝志峰最後再三強調語言的實用性：「你可以咁樣理解嘅，不管語字定係文字都好，最重要都係實用性，如果有實用性，當然要保存啦，但如果已經唔需要喇，佢會慢慢式微，就好似潮州話咁。我覺得當（廣東話）係一種文化，純粹要保存佢咁樣，咪等返文化人去做囉。最緊要政制行得通，其他爭議點就會微少少。」



延伸：
《熱血政治》第43集：大學補習班/殘體博士入學試/專訪謝志峰/聽眾狠批謝志峰
http://www.passiontimes.hk/?view=prog83&ep=43