眾所周知，香港出生率偏低，海洋公園隻安安佳佳，盈盈樂樂都冇仔生嘅。一路而來我都覺得，人哋冇仔生咪由得佢囉，所謂無兒無女坐蓮花。啱啱睇到新聞，海洋公園因為盈盈冇仔生，竟然安排佢參加「全國大熊貓繁殖計劃」，盈盈會係日內比人拉返大陸同其他熊貓交配。

我聽到呢個消息，真係痛心疾首，頂你個肺。邊個咁冇人性有呢個提議，咁樣同拉盈盈送上門比大陸熊貓強姦有咩分別？

-------------------------------------------------------------------------------------
我知一個銀仔都有兩面，盈盈應否返大陸交配？呢個問題，真係可以嗌到「天荒愛未老」，但本人強烈反對盈盈返大陸交配。

-------------------------------------------------------------------------------------
--> 捍衛動物擁有「冇仔生不受歧視」嘅權利

盈盈無仔生，完全係犯咗中國父權社會嘅大忌，我明「不孝有三 ，無後為大」。但佢冇仔生，佢想架咩？

人類係所有物種嘅最頂層，我哋向來冇人性，強行破壞其他物種嘅居所，對其他動物煎皮拆骨，甚至鎖佢哋入動物園，再隔住塊玻璃話佢哋好得意。壞事做盡，再幫佢哋爭取權益，真係好貓哭老鼠假慈悲。但我就係知我哋向來仆街，所以想大家覺醒下，可唔可以唔好太仆街。

--> 保障外勞嘅權益

盈盈話晒都係外勞，佢喺促進本地旅遊產業有好大貢獻架。人哋離鄉別井，咁做得野，我哋好應該捍衛佢嘅勞工權益。正如 Erwiana 畀人打，你都為佢抱打不平啦。盈盈一向都係「賣藝不賣身」架，冇話包生仔架，點解而家會變咗生仔機器先。

--> 唔想造就破碎家庭

按照國際慣例，盈盈如果今次交配成功，部份仔要交還畀中國政府，根據協議，第一、三、五胎會交畀香港，雙數胎則會交還中國。大家忍唔忍心要拆散人哋頭家先。

--> 假借保育之名，瘋狂販賣熊貓

近年來，中國不停送啲熊貓去唔同國家做外勞，美其名係防止大熊貓絕種，實際上利用熊貓帶來政治同旅遊嘅利益。保育熊貓點解唔可以喺中國保育，喺外國會保育得好啲架咩？

--> 你點同小朋友交代盈盈樂樂嘅關係

全世界都覺得盈盈樂樂係一對，你而家夾硬要拉盈盈北上尋歡交配，完全係瓦解一夫一妻呢個婚姻制度，變左多P，你點同啲小朋友交代。

-------------------------------------------------------------------------------------
我知道有一億個理由支持盈盈返大陸交配：

朋友話：盈盈本身係大陸落嚟架，返去交配幾唔閒呀？佢真係絕緊種架，幫佢打種係幫緊佢成個族群架，佢咪當為成個族群犧牲囉。你又知佢唔想生仔？可能樂樂真係唔啱佢口味呢，你又唔係佢肚條蟲，你點知佢唔想返大陸交配先。仲有呀，佢個仔係單非兒童，冇香港居留權好正常啫。

夠啦，我只係想make sure盈盈唔係畀其他熊貓「夾硬來」…

事情已經去到呢個地步，盈盈將會出發北上交配，海洋公園可唔可以交代下，盈盈返上去唔係暗室培慾，係可以自自然然，揀隻佢鐘意嘅熊貓先交配。我知我咁諗係好傻，中國連特首都冇得畀我哋揀嘅時候，盈盈上到去，可能一開閘，就見到：

1號熊貓：689
2號熊貓：CY
3號熊貓：英英