Holiday Driver 係形容嗰啲冇車但有車牌，星期六日會借架車玩下嘅 Driver，佢哋覺得自己係藤原拓海，但啲駕駛技術就當然係有目共睹嘅差啦。香港地除咗有呢班山寨版藤原拓海，仲有 Holiday Parents，星期一至五秒秒鐘幾百萬上落，當然係星期六日先得閒做爸爸媽媽啦，既然一星期可以同個細路相處嘅時間唔多，只係玩實在太唔符合香港「乜都 chur 盡」嘅經濟原則，太浪費人生，玩得嚟梗係要學到野啦。

________________________________

到底邊個發明又要玩又要學野？

 

先講我以前喺老鼠樂園份 part time。我係大學嗰時喺老鼠樂園帶學生團，比咗錢點可以就咁玩，梗係要學野啦，無錯，去老鼠樂園都要學野。玩完巴斯N年要分組答遊戲卡，睇完3D電影要學3D電影影像原理，睇完獅子王又要砌拚圖。一個三四年班嘅學生玩得咁有教育意義，如果我係個細路，我會覺得人生好冇意義囉。已經玩得好冇癮，有咗學校為咗增加教育意義，仲安排英文團比班廣東話 speaking 嘅學生。yes，以上呢啲遊戲仲要用英文玩，真係一次過滿足你三個願望，又玩，又學野，仲聽埋外語，真係抵過一雞三味呀。

你班仆街俾個細路抖下得唔得呀？

我明架，要成為一個完美嘅細路，真係分分鐘都唔可以怠慢，唔可以輸喺起跑線上。但平日已經好似奧巴馬咁嘅 schedule ，星期六日去玩，可唔可以唔好玩得咁「有意義」呀？有教育意義就唔好玩啦，而家係想個細路玩，定玩個細路呀。

• 喺公園見到個細路玩舖瀡滑梯，都要學外語，個阿媽邊玩要邊講 safe safe。鼓勵個仔跳兩野，就講 jump 高啲，jump 高啲。以前靈格風3個月學慬外語，out 啦，而家3個月嘅BB就已經要學外語。
• 去到餐廳，又聽到個阿媽問個仔：「雪糕英文係咩呀？你串俾我聽先俾你食。」真係好大壓力呀。
• 去玩具玩斗城，個細路揀樣玩具都要揀樣有教育意義嘅。「都3歲啦，仲咁唔定性，玩都唔坐定定咁玩，玩串字嗰啲最好啦。」

________________________________

點解無啦啦為班細路「抱打不平」？

 

香港細路真係好鬼慘，冇時間玩仲冇地方玩。我屋企樓下個公園日日都人山人海，附近成廿棟樓，得一個公園，我 feel 到條瀡滑梯都覺得好攰，一條瀡滑梯要俾成廿棟樓嘅細路瀡。結果啲路放假又係去返補習社、琴行、興趣小組。我試過星期六去佐敦谷打算鋪塊格仔布野個餐，撲個蝶，成個草地都係人，所以你明白點解郊野公園都有人霸位。

________________________________

尋日下晝仲俾我發現一件地產商嘅陰質野，事緣我經過圖中嘅私人屋苑，個屋苑名牌隔離，比我見到一個比屋苑名牌細N倍嘅牌，寫住公眾休憩用地，我行入去，真係柳暗花明又一村，個公園原來好大。嗰刻我先恍然大悟，原來個公園並唔係私人屋苑範圍，發展商為咗預防街外人入嚟玩，用咗個圍牆圍住個公眾公園，留返隱蔽嘅入口令人以為公園係私人屋苑範圍。

香港啲細路已經冇得玩，冇地方玩，點解仲要咁瞞騙啲細路，係唔係要關注下細路玩嘅權益。

P.S. 我真係好想知仲有冇其他隱蔽嘅公園，又係俾地產商隱瞞住，大家不如幫手揭發出來，俾細路多個玩嘅地方呀。