今日（12月27日）網上不斷熱傳一條射十二碼不入片段，話說片段是來自今午在旺角場上演的「康寶高級組銀牌」4強戰，南華射手陳肇麒在互射12碼階段，使出「派路式」處理，結果被東方門將葉鴻輝捉晒路，而最終東方淘汰南華殺入決賽。

射失十二碼的陳肇麒，賽後隨即在個人 Facebook 留言「Sorry.......」。不過之後有網民將當時直播片段剪輯再放上 YouTube，標題為「陳肇麒輕鬆射十二碼」，片段中旁述黃興桂指「你唔係呀嘛，你咁樣玩啲咁嘅招數嘅......佢想玩乜野呀」，而有關片段隨即於網上瘋傳。

面對連番負面批評，被指「玩野」的「陳七」在晚上又再留言，指「如果你你你同你覺得我係玩野，請你黎睇下我練波時有冇咁練過，或者去YouTube睇下我有冇咁入過。當你面對一個好熟悉自己嘅守門員而選擇一個射法，但射失你覺得我係玩野，咁我仲咩要咁辛苦係打少個仲跑到死咁幫球隊？仲有，咩叫輕鬆射十二碼？？？」

不過有網民就覺得「陳七」講多錯多，指「好似你之前個post話sorry咪得囉。講咁多野做乜？你射得li 腳，唔入就預左比人抽ga la」。

至於有線體育主播陳漢威亦留言作出補充，指「陳七」在「13年1月1號，省港盃次回合，同一個球場，你咁樣CHIP入過」。

（陳肇麒 Facebook 截圖）