世界盃16強最後一場淘汰賽，棄用C朗的葡萄牙以6:1輕取瑞士，鎖定最後一個8強資格，下輪將會遇上摩洛哥。

盛傳會到沙特豪門艾納斯搵食的C朗，今場未獲正選，豈料打簡單足球的葡萄牙更有威脅，上半場17分鐘，代替C朗打正選的21歲賓菲加前鋒干卡路拉莫斯，於禁區內轉身勁射近柱得手。33分鐘，葡萄牙一記角球攻勢，39歲的比比高人一等頂成2:0，他成為歷來世界盃決賽周入波第2年長球員，僅次於喀麥隆名宿米拿。

下半場繼續是葡萄牙天下，51分鐘達洛治右路傳中，干卡路拉莫斯梅開二度。55分鐘，葡萄牙反擊又得手，入球者為多蒙特左閘古里路。

58分鐘，瑞士終於靠一個角球攻勢破蛋，效力曼城的中堅艾簡治近門篤入。67分鐘，干卡路拉莫斯完成帽子戲法。74分鐘，千呼萬喚的C朗終於後備上陣，入替今場光芒四射的干卡路拉莫斯，惜未能爭取入球，反之另一名後備上陣球員利亞奧，於補時階段埋齋射成6:1完場。

（Photo by Justin Setterfield/Getty Images）