近呢幾年，越嚟越多香港人懷念英殖年代，好多人都掛住會專登去餅店食蛋撻嘅親民港督彭定康，而唔係而家呢個聲稱會「拎住一張凳，一本簿，一支筆走入群眾」，但係似 blogger、YouTuber 多過特首嘅梁振英。點解？唔係因為香港人鍾意做人哋嘅殖民地公民，而係因為香港「回歸」中國之後，香港人生活得越嚟越無尊嚴。

以前香港係英國殖民地嗰陣，英國殖民地政府無迫香港人當自己係英國人，反而尊重當時走難落嚟嗰啲人嘅大中華情意結，只係將佢哋教成愛惜自己生活之地嘅香港人。而家？市民遇到中國旅客隨地屙屎嗰陣，政府要港人包容佢地，主動遞上膠袋，呢啲都算啦。政府高官貪污腐敗，有責不問，對市民就有法必依，暗角打鑊。北京官員有樣學樣，一方面聲稱港人治港，高度自治，另一方面又不時以「一國」之名，對香港事務指指點點，干預港人自治，完全不放香港人在眼內。

反觀英國，百幾年嚟用心建設香港，將香港由一條漁村變成一個繁榮嘅國際城市，建立一套完善嘅法制，使香港變成一個外資放心做生意，市民放心居住嘅地方。點知好景不常，八十年代中共以強硬態度迫使英國交出香港，兼有一班「民主回歸派」搖旗吶喊，要求英國將香港主權移交畀一個極權國家。喺呢個背景底下，英國簽署《中英聯合聲明》，將香港拱手相讓，殖民地政府過去做咗幾多德政都補唔返。

究竟咩係《中英聯合聲明》？《中英聯合聲明》係中英兩國就香港主權而共同簽署嘅國際條約，受國際法約束，係中國擁有香港主權嘅唯一法理根據。《聯合聲明》亦表明，英國有責任監察《聯合聲明》實行，同埋確保香港民主進程。

睇返而家嘅雨傘革命，除咗繼續堅守陣地、衝擊政府，我哋香港人亦可以效法民主黨蔡耀昌為新移民向聯合國告狀一樣，善用國際力量，向英國追數，要求英國出面捍衛《聯合聲明》，捍衛港人自治。今日星期五下午4點，Facebook 專頁「五百人佔領英國領事館」會上金鐘英國領事館請願、留守，直至英國領事館回應訴求為止，訴求包括：要求英國宣布中國違反《聯合聲明》，並要求英國領事館為香港人提供人道支援、協助安排留守者與來港國會議員會面。

目前革命形勢膠著，要求英國捍衛港人自治，未嘗唔係一個打開僵局嘅方法。