「雙藍 ticks」引起一陣恐慌，show 到你睇完唔覆嘅 function 真係「逼得太緊」。朋友仔話 WhatsApp 玩到咁大，不於玩盡佢。

「逼你上梁山」版WhatsApp

而家係顯示你有冇睇，幾點睇。朋友仔提議加埋以下 functions，咁就真係「攞你命三千」啦。

1. Check 到 audio 對家 play 咗幾多次；個啲成日喪 play 再丁人把聲嘅，就會俾人知你係變態架啦。

2. 睇 message 之前，睇到對家 check 過我幾多次。個次數絕對反映到毒男有幾毒，以及你有幾唔信個條友會覆你。

「如何承受這好奇」……

尋日個個都不停話「世紀恐慌」，但又暗爽瘋狂 testing，口裡說不，身體卻很誠實咁體驗「雙藍 ticks」。係呀，我認我瘋狂咁睇 sent 咗有冇即時被 read。正如你見到 yahoo「娛樂投」問你「謝檸檬同王菲會唔會開花結果？」，都唔知知嚟做乜，但「如何承受這好奇」，你都會自自然然就撳「睇結果」。有得 check，真係唔 check？

將「其實你心裡有沒有我」由 uncountable 變成 countable

「雙藍ticks」完全係將危在旦夕嘅拖友推至極樂，「上次你五分鐘內覆，下次要 keep 住啦，其實可以再進步架……」，嗱，當「覆你」呢件事變得可以量化，你就會發現你要喺呢件事上尋求進步架啦。

尋找罪魁禍首

又係問責制嘅時候啦，到底邊個發明呢樣野？係唔係長期得唔到女神回覆嘅毒男？定次次負責約 gathering，都唔會有人覆佢因此懷恨在心嘅人？

係唔係我哋對其他人愈來愈冇信心？

現代人真係好冇安全感。以前我哋會信 SMS 佢會覆我，會信「遺言信箱」佢會覆我，甚至以前我哋對隻白鴿都好有信心，信「飛鴿傳書」，佢收到都覆我。而家佢收到 msg 我都仲要擔心佢唔覆我。唔通我哋真係變得咁脆弱？

畀啲時間高登仔啦……

如果你因為「雙藍 ticks」處於忐忑不安嘅狀態，驚拖友 check 住你，驚仆街上司用 WhatsApp 要你隨傳隨到，不如畀啲時間高登仔啦，我信佢哋好快就找到方法解決，因為佢哋「比快更快」架。