同婷婷BB都一齊左兩年，有時我真係想同佢講分手。

但係一諗到我哋呢啲住公屋嘅窮小子，要搵個香港女仔做女朋友仲難過等真普選。我個老友輝哥，廿九歲喇，一次拖都未拍過PLUS連處都未破，我曾建議佢不如比錢易辦事啦，佢又推三推四話要留返第一次俾佢鐘意果個…算吧啦你，見到佢真係心都寒。

所以，有得被渣唔通唔渣咩，我指嘅係，我個春袋。

我同婷婷BB係理大last year識嘅。出嚟社會做嘢之後，佢成日哦我要我轉工，話做插畫邊有前途，成日同我講邊個邊個friend幾識投資，噤下股票機又一day，阿邊個邊個幾叻仔又去睇樓咁。佢成日話咁大個人仲同屋企人住係好羞家，仲將我部電腦嘅首頁轉埋做28hse.com，話要潛意識鞭策我咁話。

好喇，我儲錢喇，但呢頭又話要試openrice個top 10 list，果頭又話轉季要買過曬d衫。喂，心諗，我嘅人生得四季，你就個個月都轉季。

佢facebook 啲狗公就最Q煩，得閒又問佢有無試過 soho間法國菜，得閒又話送榴槤乜乜乜俾佢，呢頭又問佢買咗iPhone 6未…婷婷BB不至於貪慕虛榮，但係啲搞屎棍問得十樣，我點都要做返一、兩樣。喂我唔係唔愛妳，我儲緊錢同妳上車嘛BB。

不過婷B facebook 啲 post又真係幾殺人，一張側頭單眼自拍照，配上一句似有還無的語帶相關 caption：「沒有百分百對的那個，只有願不願意共你努力的人」。即時引來273 個Like，70幾句我願意。當中不乏多少抱憾，多少過路人的杜甫式偽詩人概嘆，無非想表達英雄所見略同，唔啱今晚就溝酒論英雄，啫。

老友輝哥話佢都幾港女，我仲兜，香港女仔，係．咁．㗎．啦。

有時係有啲氣餒。

上星期，同婷B行彌敦道，佢主動話不如坐吓支持吓雨傘革命，起初我仲以為佢想打吓咭，影吓相，呃呃LIKE 咁，唔係喎！一日坐完又一日，收工就即刻過嚟，雖然有時佢都仲係拎住舊生勾勾魚生喺度食，但係，佢好似係堅㗎喎。

由起初坐吓睇吓，到開始幫吓手，掃吓地，拎吓水，再之後通宵訓咗兩晚，又幫手派退熱貼，facebook又呼籲更多人企出嚟，仲仲仲竟然鼓勵我畫d圖出嚟，等更多人更易了解而家社會狀況，我從未試過拎住支筆，可以咁滾動，我份工…終於唔只係份工。

之後我同佢每日都響街上，銅鑼灣、旺角、金鐘海富、中環我哋都有去。我一面坐係街度畫畫，一面偷偷睇住婷婷BB大汗叠細汗咁走嚟走去，拎住啲物資出出入入， 手上iPad keep住update新聞，無涼沖無冷氣無sushi食一樣堅持住，無大眼仔無背心褸屌裙，一件黑tee一條長褲…索到呢。有晚落大雨，成身濕曬，我哋仲返咗屋企換過件衫再出過嚟。

果晚忍唔住坐喺地下畫畫嗰時，滴咗兩行馬尿，佢拎住支水拎住塊餅乾行埋嚟，我抬起頭望住佢，好似有道蘇光打埋嚟咁，嗰刻，我覺得佢係天使。跟住全場仲要啱啱起歌唱海闊天空，能夠遇上婷婷BB，能夠一齊參與其中，我好榮幸。

有啲人話出黎佔領嗰班係收錢嘅，你哋太睇小港女喇，港女係貪錢係B哩巴拉，但港女更加愛姿整愛靚，你見佢哋可以為咗瘦少少為咗塊面V少少，唔食唔飲比針桔比刀就知啦。

俾幾差野要佢哋頻頻撲撲，污糟邋遢，又要瞓街又要比人影到個殘樣，仲要無水洗臉呀，諗都咪駛諗，唔摑你１４巴都傻的嗎。

但係如果佢地可以唔講錢去做呢件事，你就知，果份勇敢，果份堅持，果份成熟，個春袋俾佢渣住一世，都值。

係呢個時候，如果你facebook仲有啲私影妹呀女神呀日日仲post緊自己啲巴黎酒店相呀，韓國泳衣夾波照呀，三不五時又倒瀉奶問全能facebook邊度買iPhone 6 呀，投資倫敦金記住搵佢呀等等，呢啲女神無啦啦濕住話比你屌，我都建議你回返我老友輝哥果嗰句：「Sorry，我要留返比鐘意嗰個。」

雖然妳係巴渣咗啲，有妳講果陣一定無我講，成日仲要食生勾勾，月尾又會爆炸black 面蠻不講理女皇上身，但港女可愛起上嚟，真係…扯爆旗。

100%的女神，其實，就在街頭巷尾之間。