熱血時報 | 菇派定筍派? 明治朱古力總選舉公布結果

菇派定筍派? 明治朱古力總選舉公布結果



菇派定筍派? 明治朱古力總選舉公布結果

日本民間有樣萬年爭拗,就係到底明治(meiji)生產嘅國民級朱古力零食「蘑菇山」(きのこの山)好食啲,定係「竹筍里」(たけのこの里)好食啲。由於「蘑菇黨」及「竹筍黨」各有死忠,明治今年初索性舉行投票一較高下,結果「竹筍黨」以693萬多票勝出。 

零食生產商明治製菓在今年2月26日至7月31日舉行「蘑菇山・竹筍里國民總選舉2018」,今日(9月11日)公布投票結果。最終「竹筍黨」以693萬1220票獲勝,「蘑菇黨」就以676萬1773票飲恨。投票選項仲有「どっちも党」揀,即係中立黨,得票都唔弱,有223萬8204票。 

今次總選舉委員長由「嵐」嘅松本潤擔任,雖然佢在結果發表會致辭時表示「長年以來嘅激戰已經結束」,不過大家都預咗呢個議題係會繼續拗落去。 

「蘑菇山」在1975年推出,而「竹筍里」就1979年發售。由於兩者口味相近,各有擁躉,38年來坊間不斷有討論到底邊一款好食啲,甚至有電視節目用味覺感應器做測試。不過單論銷量,「竹筍里」在多項調查都顯示暢銷過「蘑菇山」。


(圖片來源:明治網頁截圖)



作者
讀者回應