呢篇稿，係真心寫畀鍾情同埋支持港漫嘅老友記，過目過目──相信，大家都知道近呢十年，港產連環圖嘅環境係幾咁惡劣！

如果我哋依然唔理，相信喺三年之間，港漫嘅「期刊」必然全面消失，就算尚存一兩本，咁樣……已同「全面消失」相差無幾！

講真，港漫之所以攪成咁，除咗因為既有從業員個個扯乾之外，新一輩亦因為缺乏發表嘅平台，而難以成熟接上！好勒，上一輩（例如牛佬呢Ｄ）唔講，但係我自己相信新一輩係仍有可為嘅！佢哋嘅潛力，只係客觀環境所致而未能好好發揮！所以，我哋嘗試開創一Ｄ全新經營手法嘅平台，睇吓可唔可以改變呢個「困局」！

如果可以，港漫亦會順理成章轉型，以另一種出版模式繼續娛樂大家！

呢，依家我哋開咗一個「熱血少年漫畫網」，上載一Ｄ新人又或者舊人嘅連環圖作品，免費供應讀者欣賞！

（熱血少年漫畫網連載作品，黃洋達原著、君不見編繪的《茅山高校》）

記住，係免費嘅！只要喜歡，鍵入www.passionteens.hk，就即時可以免費欣賞各個畫手嘅作品！之但係，既然「免費」，咁Ｄ作家又點樣維持生產作品呢？

唯有依靠大家──認為嗰個作者有為嘅話，「課金」支持！亦即係話，如果嗰位作者得到適當「課金」支持，就會越寫越起勁；相反，寫極都冇人「課金」，咁就注定「收皮」咯！

原本出版嘅經營模式──係畀咗錢然後攞走本書；依家調轉勒……認為好睇，先至「科水」，甚至乎唔科！

咁大家話勒──呢個「熱血少年漫畫網」嘅經營方法，係咪絕對值得大家支持？

當然，講到尾都係嗰句──如果你唔支持港漫，又或者認為「貢」上某Ｄ大陸漫畫網任睇嗰Ｄ翻版作品都冇問題嘅話，咁就另當別論！

我從頭到尾都係嗰句，呢篇文章係畀嗰Ｄ鍾情漫畫同埋支持港漫嘅朋友收睇嘅！

好，如果有興趣，就第一時間鍵入www.passionteens.hk「熱血少年漫畫網」啦！

呢個行動掂唔掂，靠你哋勒！