午夜夢迴，昨晚喺夢中飄到公元前262年嘅山西高平，亦即係當年嘅長平，經歷咗戰國時代一場戰役。

當時秦趙交戰，不過秦國就不停講：「大家可以用溝通去解決問題。」所以，秦國就邀請趙國派使節去秦國咸陽會談，秦國高官同趙國使者言談甚歡，不停講：「大家都係前周朝人，合作可得天下，最好趙國一收到秦國國會提出嘅停火協議，就即刻『袋住先』，咁秦趙兩國就可以一齊去攻擊其餘五國，繼續做大茶飯。」當年嘅趙國軍隊被困長平，主帥趙括自把自為，見秦國同趙國使者喺咸陽和談時言談甚歡，就覺得秦國應該會尊重趙國，和解只係朝夕，於是就想搵著數，先下手為強，以為手上有兵，可以為趙國多爭一啲威勢，就放棄上手主帥廉頗以守為攻嘅方法，主動出擊，話如果秦國唔退兵和談，提出對趙國有利嘅和解方案，趙軍係會出擊。點知一出手，就被打到焦頭爛額，自己亦中箭身亡。

趙括陣亡後，秦將白起派人去安撫趙軍，又再話：「我哋秦國係友善文明之師，一定會同執行秦國國會提出嘅臨時和解方案；嗱，你哋先投降繳械，我就會畀飽飯你哋食，然後再慢慢傾，用將來嘅時間去完善方案，袋住先啦，有飯就食啦。」趙軍當中有人提出：「我悲見趙國好大鑊，秦趙兩國係鄰舍，大家有係前周朝人，場仗再打落去，只會令大家都有損失。如果搞到咁局面邊個有著數？」當時大部份趙軍六神無主，就覺得「袋住先」，然後再「優化」和解方案，就好啦；同時又覺得秦軍係友善文明之師，秦國又已經富起來，應該發財立品，就和應：「好啦，最緊要有飯食，又可以『袋住先』，然後再傾；真係可以又食又拎。」

當趙軍接受投降協議後，秦軍就畀飽飯趙軍食，當中有蛇齋餅粽，趙軍食飽後，個個醺醺欲睡，先知中計，40萬降卒大部份被坑殺。有人死前問：「你又話大家都係前周朝人，大家係鄰舍，又話係友善文明之師，點解用啲下三流手段去呃我哋投降，然後再坑殺？」答曰：「你哋唔死X晒，我哋點殖民趙國，正白痴！」

（圖片來源：中華網）