817完咗兩日，Facebook 個 news feed 仲不停飄出大量反佔中遊行人士圖片。真係好壯觀，好少可一次過一連幾日見到咁多痴線的人。真係好想入紙同健力士申請，列817為香港首次集合中港外痴線人士上街。
我只係好奇青山817放呢班友出來，嗰班友仔係唔係蕩失路，行咗兩日都未行到返青山。薑蓉話要多謝25萬人支持，又話告有線呀，又考大家知唔知伊波拉方程式呀，又話叫大家拎證據證明有派錢呀。再一次證實佢係患上周星星嗰隻「無定向喪心病狂間歇性全身機能失調症」。大家真係唔使太認真同計較，痴線佬一定係唔認自己係痴線架。
_______________________________________
薑蓉及其痴線聯盟的朋友仔提出好多問題，用正常人思維同佢哋爭吵行唔通，我哋要用「痴痴地」的方式答返佢哋：
薑蓉：有咩證據證明我哋有派錢，你拎證據出來啦？
我哋：搵人朗讀啲銀紙號碼俾佢聽啦，你哋對下啲錢係唔係你哋派嘅……（佢哋咁蠢實拎出來對架，快啲搵人試下啦）
李慧琼：警方估計的11萬人，是2004年以來由維園出發，最多人參與的一次游行，反映市民已對「佔中」忍無可忍。
我哋：你睇下個圖片，反佔中啲人少過平日 MK 行人專用區同尖沙咀廣東道啲自由行啦，香港人日日都忍到架，全靠中央政府派啲自由行訓練我哋。
薑蓉：你哋有幾多人知道，伊波拉嗰個方程式係乜嘢呢？
我哋：我知我第一個將條方程式植入你人體度，以毒玫毒，醫返你個無定向喪心病狂間歇性全身機能失調症。
鄭耀棠：反「佔中」簽名數逾150萬，呢啲就係民意。
我哋：簽名呢啲浮雲野黎，嚇我哋唔到架。細個我都日日冒阿媽簽手冊啦，我仲冒劉德華同周慧敏簽 YES 卡賣俾同學仔啦。霍啟剛話事解，全港700幾萬人，唔簽個500幾百萬，即係500幾百萬人撐佔中啦。
薑蓉：若員工被上司迫做不想做的事應辭職。
我哋：咁薑蓉你仲唔辭職，係唔係中共綁架咗你屋企人上太空探月呀，人哋侵犯你要叫唔好呀。
_______________________________________
另一邊廂，記者做咩唔體諒薑蓉佢哋呀，人哋痴線你哋都唔包容：
記者：遊行團體在酒樓「包場」請客你覺得有冇問題呀？
--> 從古到今，死前都興食飽先上路架啦，冇問題啦當然。
記者：有記者見到有人周街派錢？
--> 七月呀，係要撒下紙錢架啦。
記者：你見唔見七一遊行個 density 比817高好多？點解七一咁多人係9萬，你哋咁疏都25萬？
--> 七一啲人企得迫囉，啲人鐘意痴住前面嗰個人的屎忽遊行。
_______________________________________
香港地真係好大壓力，你見咁多人痴線你就知啦，到底佢哋幾時先肯返青山接受治療，我哋真係好攰啦……
（本文原載於作者面書專頁）