其實我補習係有「財散人安樂」嘅信念……

其實我補習係有「財散人安樂」嘅信念……


Amanda Tann嗰個「18個月大BB幼稚園面試班」廣告畀人鬧左幾日,仲推埋上報。我其實都有補過四年Amanda,今日我先講我「補過的」Amanda,再講返佢個「18個月大BB幼稚園面試班」。

_____________________________

我喺補習方面好有經驗,我指畀人補方面。我由小學六年班開始補習,對比起而家啲細路,真係輸喺起跑線上。不過六年班前就要補習,邊有時間睇卡通片?

由我入band one中學開始,我就不務正業,中一至中四每年都幾乎要留班,但好好彩,總有一兩個同學比我唔好彩墊我底,最後留唔成班。中三Phy Chem Bio三科分數加埋,都唔合格。由於我科科都咁上下低分,喺冇得揀嘅情況下,我好似叫車仔麵咁,乜科都揀D,形成好奇怪嘅科目組合,中英數、Econ、Bio、Geog、中史、Art,文理商都有啲。

中五我終於發現食晒屎,冇樣野係識嘅,於是我就訓身補晒所有科,除咗中史,我連Art都去補。甚至同一個科,報多過一個補習班。而家諗起,根本忽忽地,補咁多,都冇時間溫書啦。

_____________________________

「財散人安樂」嘅信念……

根本我都知補咁多,坐足咁多堂,自己唔溫都冇用。但只要我交咗補習費,我真係舒服晒,覺得「心安理得」,成績「一定得」,我實拎8A。我個心態就好似出門常備保濟丸,去旅行買保險。

「In case乜乜乜,呢啲錢真係唔慳得。」總之同學補咩,我就報咩,當唔好執輸又好,集體gathering都好。「In case佢貼中題目呢,in case佢教到樣technique計數快過用Casio同心算呢。」即係明知太爺生前撳平安鐘都要練習,你都燒部iPhone畀佢咁,「In case太爺下面個個friend都有,攞起手冇得用好唔方便架,橫掂Steve Jobs都係下面啦,可能有教佢哋呢!」

_____________________________

咁到底Amanda Tann 得唔得?

喺唔知「邊個話得架」嘅情況下,我中四開始補Amanda Tann,補到中七。第一次上去旺角雅蘭補習社,見到Amanda Tann張poster我真係覺得佢好似甄妮。收錢條龍長過公立醫院排街症,好多著住名校校服嘅學生排緊,港華又有,QC又有,DBS又有,個時我就覺得應該得架。(又話說個時,我見TBB童星成展權都排緊,我心諗今次冇死啦。)

我唔知Amanda得唔得,我只知佢做生意真係好得,佢係將「階級觀念」發揮得淋漓盡致。會考年代,Amanda有補合格班、補C班,仲有補A班。特定嘅班先有期間限定notes,佢又會喺班上講,呢啲只for補C班,合格班冇架。唔係你想入補A班就入到,你要先考入學試,就好似哈利波特帶帽分college咁。

我最後入左補C班,冇C有咩賠償?佢聲稱係會賠返所有補習費畀你,但有條件,每星期上堂交作文畀佢改,佢改完話你達到「佢認可嘅C級水平」,而你會考考唔到C,佢就賠錢。而家諗起真係好戇鳩,改個個係佢,佢話你唔達水平就唔達,你點會有得賠。

由於Amanda學生遍佈全港九新界,好少見到佢,你有問題,班上有個好似「獎門人隔離嘅獎老」嘅助教,就可以問佢啦。

再諗深一層,入學分班,一開始,叻同學就會入A班,差同學就會入差班,到底係D同學本身叻,定係Amanda好叻教到啲同學好叻?好似搵糖妹賣抗老精華,本身佢咁後生,一定work架,我覺得你要call羅蘭姐來,搽到變糖妹先有說服力。

_____________________________

講返Amanda Tann嗰個「18個月大BB幼稚園面試班」……

單睇個2奶架廣告,插Amanda唔夠全面,要插就從根本入手,睇下個課程(見下圖)。


課程目標:自理能力,故事演說,對答技巧。呢啲我阿媽同公司阿姐都話我冇架而家。觀察力、表達力、聆聽敏感度,呢啲食平時廣告話有DHA嘅奶粉搞掂啦。

一堂一個鐘:喂,個18個月大BB能唔能夠聽一個鐘唔訓。我開會多過半個鐘,我都已經要用意志力維持生命力。

價錢:10堂,2000幾蚊,印傭都請到啦,請個印傭返來齋同BB按腳都好過上呢個班啦。

_____________________________

點解要群插Amanda?

呢件事唔合乎常理,我理解上兩歲前唔係負責訓架咩?Amanda擺明呃飯食,真係無庸置疑。但大家需知道,佢真係「搵食啫」,佢係唔使有教育工作者嘅良心。佢可能唔應該咁樣賺錢,但佢係可以咁賺錢,大家expect佢有良心未免太天真。

要插不如插教育制度……

政府完全冇視幼兒教育催谷問題,冇正視「幼稚園大學化」,幼稚園遲下都要交final year project架啦。係因為我哋荒謬嘅教育制度,先會導致有呢啲補習班嘅產生。

Amanda話上年9月開始搞呢個班,佢話你哋班人大驚小怪啦。我覺得最荒謬嘅係,上返佢website,「18個月大BB幼稚園面試班」,香港、九龍、新界都仲開緊班,「咁即係咩?」,即係好明顯呢個班有好多人報,並且係有市場。

要插就插埋啲「有口話人,冇口話自己」嘅怪獸家長……

個啲話「18個月大BB幼稚園面試班」變態,又送個仔去playgroup嘅怪獸家長,你哋又好意思鬧人變態。「Playgroup有鬼婆教英文架,邊學邊玩你識乜野呀你。」Play點解要畀錢play,明明遊戲小組,用個英文名playgroup,搞到件事勁啲咁。點解而家個世界咁一雞三味,一個BB有冇需要咁multi-tasking,play就play,學就學,要學就play得唔開心啦,要play就唔好學啦。樣樣都二合一,好趕咩而家。

_____________________________

我講完,你睇完新聞,你睇埋「18個月大BB幼稚園面試班」內容,你都報,我為你個仔難過囉。如果我做幼稚園校長,我唔會in個BB, 我會in個父母,如果個父母係變態嘅,教你個仔呢個project我同你哋合作唔來。對於個BB,我唯一要求係,佢識得笑囉,細路識得笑,喺而家嘅香港我覺得最重要囉。

痴線幼稚園面試班資料:

http://www.everlearning.edu.hk/toddlers/?k1interview

原文出自姐死姐還在 Facebook
https://www.facebook.com/164695310405483/photos/a.164701523738195.1073741827.164695310405483/374433172765028/?type=1&theater