英格蘭國家隊踢大型賽事一直雷聲大雨點少，不少人都歸咎於英超沒有歇冬期，甚至更於聖誕新年大開快車，不過據《泰晤士報》報道，英超有機會於2020年引入歇冬期，到時國家隊表現不滯就無得再瀨喇！

報道指足總、英超及英格蘭聯賽會達成協議，於2020年2月，亦即歐洲賽重開之前引入歇冬期，方案是將一周的10場比賽拆開兩個周末上演，屆時所有英超球隊都有一個周末空檔，換句話說會有13日不用比賽，而球迷就繼續有波睇。當然，英超豪門會否趁空檔到中東或亞洲地區掘金，就會是後話了。

消息指為了騰出空檔，英格蘭足總盃第5圈比賽將會安排在周中舉行，而第5圈和波重賽的安排亦會取消。

不過有關安排只適用於英超，英冠以下組別卻繼續無得抖，因為球隊一季要踢46場聯賽，遠多於英超的一季38場聯賽，故此根本就無走盞位。