由幾時開始，我哋做人做事的準則係要睇「共產黨高唔高興」？大家要含淚投票畀泛民，否則「共產黨最高興」；大家唔好退出學聯，否則「共產黨最高興」；大家唔好批評左膠，否則「共產黨最高興」；大家唔好衝擊升國旗，否則「共產黨最高興」……

咁點解當日又要勸大家從佔領區撤離？唔怕「共產黨最高興」咩？點解民主黨要入中聯辦密室談判？唔怕「共產黨最高興」咩？點解要反對本土派的「光復行動」？唔怕「共產黨最高興」咩？點解左膠孔令瑜當日要向毛范譚三個溫和本土派開記招下戰書？唔怕「共產黨最高興」咩？點解左膠要支持中港融合？唔怕「共產黨最高 興」咩？點解天主教正義和平委員會要「為中港融合祈禱」？唔怕「共產黨最高興」咩？點解孔令瑜要盲撐縱火犯施君龍？唔怕「共產黨最高興」咩？點解左膠要圍插陶傑？唔怕「共產黨最高興」咩？

麻煩你哋解俾我聽？

另外，你哋憑咩野判斷港大退出學聯，共產黨就會「最高興」？點解唔係公投結果反映年青一代急劇「去大中華化」，反而令「共產黨最頭痕」？共產黨會寧願揀一個大中華的學聯做對手，定係揀一班本土意識抬頭的人做對手？你敢肯定咩？更何況，共產黨內部咁多派系，佢哋既利益同取態會全部一致咩？就算當你判斷正確，咁根據係乜野？證據在何處﹖說好了的「科學客觀中立不偏頗不以偏概全」呢？？？

做人可唔可以唔好咁虛偽？唔好太雙重標準？「知行合一」少少好嗎？我要求都唔算好高啫。而家兩邊龍門射晒，你玩晒啦。咁搬龍門法，同共產黨有咩分別？學葉寶琳小姐話齋，「你憎中共卻變成擁有中共特質，值得嗎？」（2015年2月11日）

其實公道少少講，今屆學聯可能已經係歷屆之中最唔近大中華同左翼意識形態的了。但咁唔代表港大學生就必然要支持同加入。無論左定右，起碼要有一個基本共識，就係要尊重民主機制，尊重公投結果。雖然好老實講，我暫時睇唔到退出學聯會有咩即時而明顯的影響，但選舉總係有輸有贏，麻煩學聯班人尊重返投票者的意願，講少啲酸溜溜的意氣說話，啲咩「垃撚圾」的言論就麻煩衰衰地道返個歉，俾返少少風度。咁大個組織咁疊馬又成億資產又盛，唔係咁都輸唔起掛？

最後補充返，講咗咁多，大家可能會以為我好支持退聯。但好老實講，完全唔係。你見我之前一直冇乜講過退聯單野就應該估到，其實我對退唔退聯係冇咩感覺，亦冇咩所謂。我只係睇唔過眼有啲人發膠論又從來冇反省意識啫。

圖片說明：前學聯秘書長陳倩瑩（Daisy Chan）於港大退聯公投獲通過後於個人面書上的發言。