農曆新年假期完咗，打工仔陸續歸位初五咁嘅樣返工，到處人流都少左。當然大陸自由行仲係無處不在，傳統旺區如旺角、尖沙咀、銅鑼灣就幾時都咁多人，住宅區上水、屯門、沙田水貨客阻街阻到行唔到。有住外國嘅香港人話怕咗自由行雀巢鳩佔，費事返香港玩喎！諗落好似唔係幾對路，呢度係你屋企，有乜理由要你委曲求全先？我呢個專頁係有唔少移居外國香港人讀者，多年來未返過香港，我希望佢地有機會都可以返香港睇下，呢片彈丸之地仲有好多仲未至於被自由行嚴重污染嘅地方值得去。

要買貴價貨，國金、利園、海港城就唔好諗啦，太多人鳥！置地、太古廣場、歷山大廈、太子大廈算係較少人，好行D！中價貨之中，又一城、黃埔花園、太古城相對較少大陸自由行，因為對佢地黎講呢幾處地方唔算好就腳嘛！基本上，全香港所有大地產商旗下購物中心都係倒模一樣，新地系：東港城、新城市廣場、APM；信和系：荃新天地、奧海城；徐子淇老爺系：新港城、新都城、東薈城，嗰啲舖頭全部都係差唔多，行一個就得㗎啦！唔介紹啦！ 

如非必要，我係會避去旺角、尖沙咀、銅鑼灣，就算去，我都揀次熱門、甚至冷門地方，至少係自由行未識得摸到黎先。旺角始終係好能夠代表香港，但自從西洋菜南街變晒電器舖、化妝品店之後，我去都只係去睇下街頭表演。我鍾意去朗豪坊高層小舖，80M模型專門店更加唔少得，但一到咗唔知7定8樓賣波鞋嗰層就好大鑊！另外新之城、家樂商場、信和、現時點（好似）都係無連鎖店進駐，旺角黎講算係好難得㗎！同男仔講我會去現時點，佢地會笑我毒，冤枉呀，我齋睇乜都無買呀！

行遠少少，我會去油麻地駿發花園，去百老匯電影中心欣賞冷門小品製作電影，睇完仲可以去四座樓下拍八達通減兩蚊！上海街有好多舖頭好有特色，佛具、廚具、鉸剪款式夠多夠齊，仲有棺材舖（啋！）我最鍾意睇到有人馬路上左穿右插踩單車送石油氣，好勁！

唔去大商場，要買平嘢，港九新界都好多地方有小攤檔，最近觀塘物華街檔攤要搬啦，特色平民雜貨街買少見少。港島有北角馬寶道、銅鑼灣渣甸坊、灣仔太源街、中環利源東／西街；九龍區佐敦寶靈街、油麻地廟街（夜市）、旺角花園街、深水埗長沙灣道、福華街。新界好似比較少呢類街道，但就有墟市，例如天水圍天秀墟、錦上路墟（周末）可以去尋寶，遲吓仲有粉嶺聯和墟重開，大家拭目以待啦！

唔買野睇吓都得既，你估我去到咩都買咩！香港大把地方尋幽探秘，個人比較鍾意孫中山文物徑同埋屏山文物徑，仲有一個比較隱蔽嘅屯門紅樓，香港除咗親台人士之外，未必咁多人知，大陸自由行應該唔會去啩（我諗）。香港行山地方好多，鄰近地區如澳門、新加坡係無乜山，要好好珍惜我地有咁多郊野公園啦！金山係好適合一家大細玩，唔會太難行，又較近市區，最可愛係一班為食馬騮，好鬼趣緻抵死！上鳳凰山係睇到澳門，環境優美，但係難度比較高，非常陡峭，對初學者黎講比較吃力。

仲有好多好多地方我都想介紹㗎，例如睇維港唔一定要俾錢上天際100，去中銀大廈，辦公時間內到大堂登記，職員就會俾張訪客證你上43樓，一樣可以鳥瞰維港，灣仔中環廣場連登記都唔駛就上得！赤柱懲教博物館、筲箕灣海防博物館、動植物公園都值得去吓，你話香港點會淨係得購物咁膚淺先？