12月30日私隱專員蔣任宏先生於其網誌再次談及「被遺忘權」，佢「呼籲反對『被遺忘權』的人士保持開放態度，從不同的角度重新檢視這個議題」。

鍵盤戰線都呼籲私隱專員擘大佢雙眼，睇清楚「被遺忘權」邊度提出嚟，歐洲人權狀況同香港有咩唔同。人哋歐洲各國喺世界新聞自由指數年年排十名內，香港？由2002年第18 位跌到2014年嘅第61 位呀！跳樓都無跌得咁快！「網絡洗腦被遺忘權」已經令到好多新聞搜尋唔到，英國《衛報》同 BBC 都係受害者，你話無損新聞自由？「網絡洗腦被遺忘權」根本係令香港新聞自由雪上加霜！

你以為喺 Google 搜尋唔到就係一了百了，你自己都講「原來的資訊會繼續存在於源頭，並可以在網上供人直接查閱」。你只係令人難咗去搵資料。而事實係，Wikipedia 同 BBC 為左對付呢個無謂既「網絡洗腦被遺忘權」都製作左被移除既縺結清單。呢個所謂「被遺忘權」根本係治標唔治本嘅鴕鳥政策。

而乜野係「不完整、不相干、或以原本收集資料的目的來說是超乎適度，以及過時」嘅資料？唔完整，補完後咪完整囉！唔相干，同邊個唔相干？過時就要刪除，你老人家都過時，你唔 delete 自己？「以原本收集資料的目的來說是超乎適度」？咁你條私隱法廢架？條保障資料原則第一條 (1) (b) 係垃圾嚟架？根本以呢啲原則去決定網民可以搜尋到啲咩係多此一舉！

同埋你當 Google 真係神呀？一間商業機構點解可以比咁大權佢去決定網民可以搜尋到啲咩？佢只係一個網絡世界嘅中介人，佢唔係神！佢更加無權做網絡判官！決定睇啲咩或者搜尋啲咩係網民嘅自由。

最後，而家喺香港，好多人已經不停提出，要對香港人進行思想改造、再教育或「再啟蒙」。 因此我地希望大家都去到南華早報嘅投票（http://goo.gl/R5o7yQ），同網絡洗腦機 say NO！同埋一齊簽署反對香港引入被遺忘權既聯署（http://goo.gl/yfjUIo）！互聯網係我哋最後一條防線，我哋堅決反對「網絡洗腦被遺忘權」，絕不退讓！

作者簡介：

鍵盤戰線（下稱「鍵戰」）創立於2011年，是一個矢志保護網絡自由的非牟利組織。鍵戰成立之初的主要工作是處理2012年的版權條例修訂草案，即坊間俗稱的「網絡廿三條」，以保障網民的言論及創作自由。 鍵戰堅信網民的權利不應受到任何形式，不論是版權法、私隱法等的過份干預，因此我們十分關注各種有可能影響到網民權利的議題。我們希望透過參與及舉辦各種活動，例如遊行、論壇、立法諮詢之類的活動，喚起公眾對網絡自由的關注，從而建構一個開放及自由的網絡社會。鍵戰現時正在處理的議題包括2014版權修訂條例、私隱法（被遺忘的權利）以及其他網絡相關的議題。我們今後將繼續為網民發聲，捍衛網民應有的權利。