今年香港嘅白色恐怖新聞太多，所以想寫啲外地嘢調劑下。不過，我都會同香港嘅事做比對，等大家可以集思廣益，睇吓來年點同港共對抗。

作為旅居關島香港人，想同大家講吓今年關島第一媒體 Pacific Daily News（Well，關島得兩份報紙，大嘅一間當然係第一媒體啦）選出嘅十大事件。當中有幾單想提出嚟同大家分享。

第十位：藥用大麻合法化

2014年11月關島大選時，一併為藥用大麻合法化一事作出公投，結果有56%選民支持藥用大麻合法化，關島衛生局同立法院要喺9個月內完成立法程序，去容許末期及長期病患者去使用藥用大麻止痛。有關公投議案亦叫做 Joaquin "KC" Concepcion Compassionate Cannabis Use Act of 2013。Joaquin "KC" Concepcion 係關島一位已故歌手（藝名：Savage K），於2013年因癌症去世。因為關島未有藥用大麻合法化條例，KC要去美國本土治療時先可以用藥用大麻止痛，佢嘅家人對有關公投獲得通過感到欣慰。我會諗：如果香港有人提出類似議案，唔知啲村民（尤其係X光社之流）會有乜反應？

第九位：關島總督連任成功

關島今年大選，現任總督 Calvo 再次連任，亦令共和黨可以一連四屆（共16年）執掌政權；而民主黨亦繼續以9席對6席控制立法院。而今次大選亦以一人一票選出律政司、駐美國國會代表，以及公共機構監管委員會等職位。簡單一句：香港人喺政改唔應該只要求一人一票選特首，更應該要求分區多議席多票制普選立法會，普選廉政專員、核數署長，以及首席大法官，要求所有由特首推薦嘅問責局長／司長，或其立法會指定主要官員，由立法局作公開面試。

第八位：準時退稅

關島用美國稅制以 calendar year 做計算，制度係一出糧就有僱主即時扣起代為交稅，而喺下一年4月中前要交報稅表，扣多咗就退稅，扣少咗就即比。過往十幾年政府以無錢為理由，一直拖延退稅，有人等7年都未有錢收，最後要告政府。Calvo 上任後以賣債券籌錢還稅債，再加上審慎理財，令政府呢幾年都可以準時退稅，亦令佢今年選戰得勝。呢個故事係講以民為本嘅重要性，港共點學都學唔到！

第五位：高官議員加薪奇案

關島公務員已經有近廿年無加人工，喺2014年大選前嘅大半年，Calvo 公佈話政府財政有改善，所以會執行喺2010年（即係上次大選前）已經通過不過因為財赤而無執行嘅加薪。不過有人快會有人愁：部份起薪點加幅達5成，而我亦有同事因為喺頂薪點而只加唔夠$10，而 Calvo 就話議員同高官無得加，仍要共渡時艱。

不過當選舉一完，喺 Calvo 放假時，代理總督 Tenorio 就突然入信去立法院，要求以緊急立法形式，取消公開諮詢，要求立法院立刻投票決定為議員同高官加薪，即議員加薪至年薪美金8萬5（即港幣約66萬，或月薪5萬5，已經屬全美最高嘅立法院薪金）；大部份高官及副總督加至年薪美金11萬（即港幣約86萬，或月薪7萬2），總督就加新至年薪美金13萬（即港幣約101萬，或月薪8萬5）。有關動議通過後，居民立刻反彈，主要原因唔係加幅，反而係有關方式剝奪咗居民嘅公開諮詢權，有位當日缺席會議嘅議員現時提出再立法取消加薪法，將會於1月由新當選嘅議員討論。

諗一諗，香港啲兩級議會議員同高官嘅人工，真係天價：香港一個AO同幫辦都唔止收5萬5！重唔好講啲中英文都一pet屎嘅立法會議員，仲收得多過人哋嘅總督！簡單一句：香港嘅官場及政界，真係貨不對辦。

第一位：Chad DeSoto 奇案

Chad DeSoto（簡稱 DeSoto）喺一位準大學生，於2013年情人節前同女友鬧翻，之後打電話同當時去咗美國本土讀書嘅女友講要令佢永世難忘，就於當晚去關島旅遊區 Tumon 用房車及刀無差別襲擊日本遊客，造成3死9傷。之後佢用精神失常做自辯理由，控辯雙方搵咗三個心理學家見過被告，兩個話佢有精神問 題，一個話佢正常。陪審團決議話佢有罪，最後判三次終身監禁再加額外刑期。判刑後，DeSoto 發言插陪審團：

"I want to help you all heal from what has happened so much but I refuse to do so by letting everyone continue to believe that an innocent man is guilty."

呢啲講話，自從喺今年遮打革命後，就成日聽到啲高官同警官日日講；不過世界好公平，DeSoto 要坐三世監，你哋班賣港賊將來亦唔會好佢好多！